LEMELERVELD – Un kuppeltie hef un caravan ekoch. Ze haan beide pensioen ehaald en woln daormee meer op pad. Eerst was de vrouwe met un dochter allis nor un camping ewes, mar de kerl hatter nog nooit in eslaopn. Pas nog wast spul un wekkie nor un camping ewes. Daorrnao mos de caravan schonemaakt wurn, want later int jaor wult ze weer nor dezelfde camping veur langere tied.
De caravan stiet nao op de oprit en de vrouwe zeg almaar teegn heur man dettie nie zo mut dramn en det zie de tied mut hem umme ut schoonmaakwerk te doen. Tja,ie zoln denkn assie ut noe saam met zien beiden doet, ist toch rap edaone, mar zien schonemaakn en heur schonemaakn is toch heel verschillend. Um ieder dan ok zien weerde te laotn muj menare de ruumte geem
Ok de veurtente mut nog uuteprobeert
wurn. Die haan ze nog nooit gebruukt. Det kon volgens de kerl wel ens op un parkeerplaaste, mar det vond de vrouwe gien goed plan. De veurtente zol dan helemaol gasterig wurn en dan zoln luu bie oe kom, waj ant doen waarn. Det maak toch bal uut vond de kerl, mar de vrouwe wol gien gedoe. Dus ut mos mar bie familie die genog ruumte had um de veurtente uut te zetn. Nao ut uutprobeern kwaamp de caravan weer op de oprit trechte, want de vrouwe wol nog van alles doen. De kerl dach al as zie zometiene eindeluk uutepoetst is kan ze wel vakantie gebruukn. Mar um de caravan nog un paar maand op de oprit te hem, stontum nie best an.
Ton