LEMELERVELD – Ie wult de boel wel un bettie heel haoln. Aj op un camping komp te staon is hoe ut weer is, heel belangriek. Ut kan reegn met bakn tegelieke of ie kunt ok un paar zunnige daagn met maakn. Ok mak ut nogal wat uut hoei daor staot, met un tente of caravan. Met un tente kuj mangs begin te vluukn as ie van de kolte nie meer weet waor ie an begun bint.

Un huussie zol ok nog kun mar det kost ok wat. Un stellegie gunk met un caravan waor ze int voorjaor ok al un weekie mee haan estaone op dezelfde camping. Ze naam dezelfde plekke woor
ze toen ok estaone haan. Twas mooi dicht bie de plee en asse dan neudig mossen hoem ze dur niet un ende mee te loopn. Dan hai ok minder wasse , want assie te late zol kom en de boel in de onderboxe kwiet raakn, hai ok un bulte meer wasse.

Mar de kuukens haan niet echt goed nao edacht. In disse tied vant jaor bie ok nog un bonke wind, komter un bulte eikels nor beneden. En de knuppels haan de caravan miln onder un bonke eikeboom nerezet. Dus ’s nachts slaopn deur al det lawaai van de eikels die op de caravan trechte kwaam gunk niet zo goed. Al det gedoe met ut opzetn van de veurtente kon ze nog un keer doen.

Zie moggen un andere plaaste opzeukn, want de camping was noe toch bienao leug. De eerste plaaste onder de boom was mooi egaal en de nieuwe plaaste had un bult bobbels en gaatn. Mar assie un bettie goed keek hoei ut spul gunk neerzetn, konter mee deur. Ie haan noe gien lawaai meer van die eikels die de caravan vol bulten en barsten kon maakn. De caravan is nog niet ze lange in gebruuk deur ut stellegie, mar ze leert noe a gauw waor ze op mun letn met un caravan neerzetn. Asse weer thuis komt met un caravan die nog net niet in menare sturt, kunt de buurn tenminste zien det ze duchtig op vakansie bint ewes.

Ton