LEMELERVELD – In disse tied kumpter un bult blad nor beneden. Un vrouwe had al aorig wat in de tuun lign en gunk ant beln veur hulpe. De hulpe kwaap smuns anzakn en klopn an de deure bie de vrouwe die nog in de pyama rondleup int huus. Zie deut de deure lus en verontschuldigen zich det ze dur zo nog bieleup. Mar de hulpe zei det de pyama erg modieus was en dette wellis wat aans had mee emaakt.
De vrouwe steln veur um met koffie te begin, want zie veuln zich un bettie gammel. Bie de koffie verteln zie wat ze graag edaone wol hem. Zie wol wel graag ut blad en de eikels zoveul mogeluk in de gruune containers. Toen de hulpe de containers kats vol had en alle blad op riggels had eblaozn zeie dette mos wachtn tutdet de containers weer leug waarn. De vrouwe waster a blij mee det ze weer umme ut huus kon loopn zonder de kans te hem det zie onderuut zol zeiln deur ut natte blad. Det was noe mooi vottehaalt deur de hulpe. Met heur leeftied mosse oppassen umme niet neer te kleddern had heur bezeuk al beure wasrschuwd. De hulpe kon weer op huus an mar was ok alle belt deur un man die nog graag brandholt bin bie zien kachel wol hem. De man was un bettie slecht ter biene en kon ut holt zelf niet meer uut de schure haaln. De hulpe had nog tied over en gunk daor op an. Hij had teveule haost en kreeg nog un dikke bonne umdette veuls te hard reed en daor baalnde goed van.
Hij kwaamp bie de man van det brandholt en die zei metiene a dette mooi op tied was. Hij stond bie zien auto en mos nog bosschopn doen. Zien auto wol echter niet meer startn umdet zien accu leug was. Die auto stond op zien oprit en deurumme kon de hulpe met zien auto dur niet naost staon um zo te kun overstarten met startkabels. De man vreug de hulpe offe dan int durp eem un draagbare accu wol ophaaln zodette dan zo kon overstartn. Dus de hulpe gunk zo’n accu ophaaln en bie ut probeern umme dan zo die auto an de praot te kriegn wol det nie en toen beln de man mar un garage umme te kom helpn. Eindeluk kreeg die de auto wel gangs en zei durbie det de accu niet meer oppe laadn wurn en det de man eerst mee mos nor de garage en niet eerst bosschopn gon doen. Dan zolle daor weer mun beln as de auto ut weer niet deut. De hulpe kon de geleende accu weer terugge breng en kon dan eindeluk begin met ut brandholt, waore veure kom was.
Ton