LEMELERVELD – Ut kumpter weer an. Olieboln, vuurwerk en niejaorwensn. Bie de olieboln had ienie nog mazzel. Hij gunk nor un oliebolnkraompie en zetn zien auto an de kante. Toen heurnde biet wachten in de rije wie zien auto niet op de handrem ezet had. En twas zien auto die teegn un andere auto eloopn was.

Dur was gien schade, want zien auto was teegn de trekhaoke van un andere auto komn. Die had gien schade.Det veul eindeluk un keer mee.

Veur vuurwerk zolt noe ut leste jaor ween det ut mag. Volnt jaor zal dur un bulte illegale pruttel anne slept wurn. Umme dan met vuurwerk te gon gooin wurd ok spannend, want ie kunt epakt wurn. Die illigale zooi is vake veul gevaorlukker en dan kompter ok meer luu mee te passe.

Hulpverleners bint ok vake ut mikpunt umme nor toe te gooin. De jonge daders hebt kats niet in de gaatn wat ze ant doen bint. Dus toch mar hopn det iederiene gezond ut nieje jaor mag begin. In ut nieje jaor zol de politiek ok un keer moogn begin met regeern en niet allenig mar zitn te neuln. Dur bint probleemn zat waor wat an mut gebeurn umme ut leemn leuker te maakn.

Ton