Heb ie det ok wel is?

DALFSEN – Een stukkie in oe heufd zitn en dèènk ie dan wao mok daor toch in vredesnaeme met hen? Een mooi plat stuk? Mochie det soms hemm blie`f dur dan astoeblieft niet te lange met deurloopm. Ma gao daor dan as de raphaezn met nao ut sprekuur van de Dalser dialect groep.

Daor doktert ze det stukkie dur wel uut, himmao kosteloos. Blie`f tur in gin geval met deurloopm, want daor krie`j alleen ma een zwaor heufd van. Bie mie ist tur ok uut e haelt en op pepier e zet. Hier kump ut.

Pas waak op vesite en kwaam ik met ie`ne an de praot die völle met zie`kte te maekn hef, ma die daor altied zo opgeruumd onder blif. Een aander hef ut altied net iets slimmer dan det hi-j ut hef. Daor trek um altied an op, al et e zelf ok een zak met piln op in de maand. Wat mok aans zegge, klaegn wok ok niet better van. Nou en daor hek noe een gedichie aover e mäkt.

Een pientie hier en een pientie dao
Och, det is männ vaste wè weer klao
Ie zit niet drek in zak en asse
Ie bint altied èèm goed te passe
Van buutn liekt of oe nooit wat mekeerd
Ie heb ummegaon met zie`kte, goed e leerd
Ie liekt nooit te vraogn, nooit te klaegn
Altied oe lastn in stilte met te draegn
Al hei-j nog zo völle kwaoln
Ie könt de HOPPE lèèmtig haoln
En heb ik mie zelf noe is een keer bezeerd
Dan zèèk, och det is mie de piene niet weerd

W.v.Oenen. Dialectgroep van de Hist. Kring Dalfsen.

Uut ut bukie Vässe Gruunte. Nog steeds te koop.

Artikel delen: