OOSTERDALSEN – Was ik ff bej Dirk wat suuker ophaaln, zeg Dirk teegn mej, det flessie mut ie metnem want doar wurd oe vrouwe wild van. Nou dat wik metmaakn en ik nemm een flessie Obstler met. Schient een populair drankie bej de wintersport te wenne maar det wet ik nie want bun nog nooit op de wintersport ewest. Heb een hekel an die snee en kolde dus zuuk het nie op.

Mien twee zeuns bunt wel helemoale gek van skien en zegt altied: pa det vind ie ok vast mooi wark. Noe hek ok in mien linkerknie ooit een kruusband opratie ehad, de chirurg zeegn toen: Kijkt u maar uit met voetballen, schaatsen en skiën.  Hej kon gin dialect dus int hoog Hollands.

Allenig de laatste twee sporten hak eheurd en die doe ik dus nie. Voetballen hak nie eheurd in eerste instantie en doar bun ik gewoon mee wieder egonne.

Ik nemme gin risico dus niet die sneeprut in.

Uhm , woar gingt ok alweer över ? Oh ja die Obstler, thuusgekommn zeg mien vrouwe, wat heb je daar dan voor mooie fles ? Mien vrouwe pröt ok gin dialect, ik veul mien wel es eenzaam .

Naarste is, dat ze ok nog zeg, dat spul lust ik echt niet Joop !!!!

Bedankt Dirk, weg mooie oamp.

Groetn gruune Jopie