DALSEN – Op de foto ziet ie een knieperties iezer det ooit deur mien opa ten Koate, emak is veur mien oma ten Koate.  Eigenlijk neumn wej ze opa en oma Smid. Brengt men op iets aans want ik had een opa en oma Smid en opa en oepoe Bekedam. Woarumme oepoe? Denk ik noe iniens, 

Opa en oma Smid woonden in Nejluusn en haddn een smederije, benzinepomp en winkeltie. Opa en oma Bekedam woonn an Dedemsweg en haddn een boerdereje. Miskien verskil in dialect umdet opa en oma Smid redelijk Hollands preuten altied. Mien moe trouwns ok.

Ma goed, ast nejjoarsdag was gingn wej noar Nejluusn met alle névies en nichies.

Dan ging oma Smid knieperties bakkn en zaatn wej in een kringegie die dingen op te ettn.  Mieters wat waarn die dingn lekker.

Oma Smid is överleedn en mien breur hef det iezer e erft umdet hej oma nog wel es heulp.  Mien breur is altied al slim ewest want met helpn knieperties bakkn kreegie 2x zovulle knieperties.

Ma mien breur hölt de traditie in ere en as hej joarig is bakt hij knieperties veur alle grote en kleine Bekedammegies. Altied van die plattn en gin rollegies.

Noe heb ik ook een slimme vrouwe want den denkt ben alles nö. Waarom maak ie ze plat en nie rond? Vreug sei zig af.

Hup met de telefoon googln en joa heur, sei heft antwoord.

Op oldjoarsdag heur ie platte knieperties te maakn en op nejjoarsdag mut dat dan rondn wenne met room of slagroom drin.

Nejjoarsdag ist feest en dan mut ie blej wenne en doar heurt dan sierlijke ronde met vulling bej.

Woar vrouwn al nie goed veur bunt!