DALSEN – Op de frejdag oamp goa ik de leste joarn voeballn met keals boam de 40. Wej bunt begunt met onderlinge bej ASC veur de kantine op een klein veltie 7 teegn 7 te spuln. Gin kontakt of aander geschup, ik maag nogal graag een schup uutdeeln en had doar dus völle muuite met, det det niet mog. 

Dr is toch ok bej andere verenigingn in de buurte animo veur en zo goat wej noe 1x in de moand èns noartoe een klein toernooigie afwerkn. Da’s altied mieters gezellig um teegn leu te voetballn die ie al 20 of 30 jaor als teegnstander hebt en van oe eign leeftied bunt.

Nötied kump er bitterballn en zölte pinda’s op toafel en drinkt wej een glaasie bier met sien alln. Wej trekkt een paar olde koejn uut de sloot en goat muu en vrolik noar huus.

Afgeloopn frejdag mösse wej noar OZC in Ommen en hebt wej ok nog espult teegn SVD, de sundagsclub uut Dalfsn en wej kreegn met vief twee klop. Bej SVD spult een paar jongs woarbej ik altied et geveul hebbe dak de beenn in de knup hebbe as ze mej passeert.

De foto is vant clubhuus van OZC en de jongs wöln nie herkenbaar op de foto.

Groetn gruune Jopie