DALSEN  OOST – Warschijnlijk is met ut ies kapot stootn afgeloopn vorstperiode een stuk ies teegn ut plastik an ekommn. Deur de kolde is det plastik dan heel stug en hard en kan ut niks lien. Een stukkie hard en scharp ies is voldoende um dr een beste skeur in te maakn.

Ach is jammer mar det plastik kunnie heel makkelijk plakkn. Net as een baand van oen fietse. Niet te snel want tplakt better alst ietsie warmer is. Ja plastik mut een bettie soepel wenne.

Zit noe nog nie völle leam in de viever mar wach mar is een moand dan wet ie nie woar al die kroepers en zwemmers vandan komt.

In önze viever zat last een aalscholver, goh ik schrukke dr van, daggen det iemand een stien in de viever gooien mar ff later kwaamp dr een aalscholver met visse in de bek boam water en wis nie hoe gauw hej uut de voetn möss komm. Met een paar angstige eugies kek uh mie an en vloep vloep weg vleug uh.

Ok hek een keer een mooi blauw iesveugeltie ezene. Daggen eerst dak een parkiet bej mien viever zage zittn mar toen ik goed kekke, hej een iesveugeltie en vloep hej zag mej stoan en weg was uh.

Zo’n viever is toch wel mieters mooi, voj kheb al weer zin in de sommer, lekker bakkie koffie bej de viever drinkn en dan ut leam in de viever bekiekn. Iedere keer ziej weer wat aans.

Groetn gruune Jopie