DALSEN – Stoa ik doar an de weg een touw oaver de busse te gooin, heur ik toet-toet!! Stiet Theo Feijen noar mien te zwaain, hey Jopie muj es luustern. An de Campferbeekstroate hebbie de baand lek ejag, las ik op Dalfsennet.

Tjonge det Dalfsennet is ok wat, verbind ons as Dalfsenaren toch weh. Op dat plekkie heb ik ok drie joar geleedn een lekke band ehad en ik bun niet de ienige, denk ik.

Doar zit een rioleringsputtie te hoge en doar bunnie teegn an ereejn. Zegt Theo. Theo is een breur en ome van de kunstmest Feijens volgens mej. In Rotterdam hebt zej een Feijenoord mar in Dalfsen hebbe wej een Feijenkloete.

An het ende van de Welsummerweg woont dr een hele kloete Feijens bej de kunstmestfabriek.

Ik dus mar es kiekn an de Campferbeekstroate en ja heur, kiek mar op de foto’s.

Toch mar es ff de gemeenteluu belln.

Groetn Gruune Jopie