DALSEN – Dat heb ik altied in de wintertied, roewe handn. Ik heb dan wel völle de haandschoen an maar toch vaak kold en smerig en dan hej dr zo de barstn in zittn. Ooit bun ik begunn met disse uiercreme. Bettie invettn en invriem zodat eem een bettie in kan trekkn. Det mut ie dus noa twerk doene, aj eem een urtie niks mut want det spul giet dr nog nie zo hard in, duurt wel eempies.

Tien joar geleedn had ik een jonk ant wark en denne sprak altied över sien roewe handn. Int weekend ging det kealtie de disco in en dan versierne weer een meid uut de grote stad en dan werd zo’n deerntie erg wulps as zej över de rugge en aandere lichaamsdelen evreem werd met die roewe handn. Dit jonk moss dus ok niks hebbn van die uiercreme. Nee de stadse dames wölln roewe handn, zej hej dan. Helemoale gek werd hej as dr een bettie broene dames waarn.

Mar goed uiercreme kump natuurlijk van de boerdereje en gebruukn de boern bej de koenn. Ik meene noa t melkn ging denn boer de uiers insmeern en dat was te doene want zej haddn dr vrögger mar een paar. Volgens mej spuit ze dr teegnwoordig ien of aander spul op met zo’n flessie. Ik vroag mej allenig öff, hoe ze dat doet met die melkrobots. Soll die melkrobot det ok zelf doene?

Of mut die boer toch sien bedde uut en olderwets met de uiercreme ant vriemn?
Groetn Gruune Jopie