OOSTERDALFSEN – Ik woone noe al weer meer dan 35 joar in Welsum en dus noast Diekx en Gerda van Echten. Toen ik doar 35 joar geleedn veur teerst kwame, kenn ik Welsum allenig van de watertoorn die ooit op ebloazen werd en ik kan mej det heel vaag nog herinnern dak doar bej stunde. De hele toorn lig begraam an de Welsummerwegkante van ut kerkhof.
Det stukkie laand lig volgens mej al meer dan 50 joar leug en dr gebeurd niks met. Ik geleufe det ik dr mar een keer een groot kruus opzette ter ere van die watertoorn die onze vaders moeders en opas en omas en nog völle meer mensn, de durst elest hebt. Mischien koop ik twee balkn van Diekx en houwe doar een kruus van in menare.
Joa Diekx, doar ware ik met begunn. Diekx sien va hietn Dollie en hun holtzagerije was dan ook bekend as de zagerej van PappaDolly. Det klinkt een bettie Engels mar ist nie. Vrogger haddn ie de Dolly Dots, van die mieterse mooie meidn, konn nog zingn ok geleuf ik mar die haddn ok niks met PappaDolly te maakn. Vrogger verkoggn ze bultn holt bej hun. Sie leutn det ankoomn uut Rotterdam en sie slooptn zelf ok völle gebouwn waoruut ze dan holt haaln wat ze dan tweedehans deur verkoggn.
Eignlijk was PappaDolly sien tied wied veuruut en was hej de eerste die an t recyclen was en ok nog is zonder subsidie.
Tja PappaDolly, woar kump det dan vot? Diekx vertelln mej det sien va vrögger een huntie had die Dolly hietn. Det biessie ging hum dood en doar is Jans, want zo hietn Diekx sien va eignlijk, wekkn lang ziek van ewest. Sindsdien wast PappaDolly.
Hun huus is van 1956, vertelln Diekx mej ok nog en Diekx is doar dus ok nie geboorn. Ik wette noa waorumme Diekx altied zo’n skik hef want hej vertelln mej det hej geboorn is onder de Pereboom an de Welsummerweg noast Aalvanger, bej det witte huussie.
Doar blief ie dan toch oen hele lemmn umme lachn as ie zo ter wereld komt, onder een Pereboom.
Diekx dut ut noe rustig an want hej is al 76 mar zaagt nog steeds, spiekers trekkn kan hej oe ok wel leern want hej hef dr een mieters handige tange veur. En dan hekt niet över een knieptange. Dus muj nog een keer een knienhokke of iets aans timmern? Kuj bej Diekx terecht veur een goedkoop plankie en gratis timmeradvies.
Vroeg dan ok ff noar sien spiekertrek tange, vind hej mooi.
Ik woone toch wel heel biezunder, blik mar weer, noast eerste recycling bedrief van Nederland.
Groetn Gruune Jopie
