DALSEN – Afgeloopn woensdag (toen wast nog net geen meert) bun ik noar de veiling ewest. Althans zo wurd dat altied överal enuumd. Ok op de afrekeningsbon stiet veiling mar woarumme eigenklik? Bej een veiling denk ie an een klok en över afmeinn. Dan denk ie an bodempriezn. Op de meiste veilingen in önz vakgebied kuj eigenklik better sprekkn van markt of ook wel Cash and Carry.
Ut is een heel groot terrein woar allemoale kwekers een heel klein perceeltie grond hebt woar ze hun produkten neer zet. En dan heb ik över wel meer dan 100 kwekers. De klanten bunt vaak hoveniers of eigenaars van bloemnwinkels of tuuncentra. Sej ried met zo’n golfkarregie langs al die perceelties en as ze iets interessants ziet, zet ze dat op hun karre. An die kiste met plantn zit een label die veuran bej het kantoor escand wurd met zo’n bliebapperaat. Automatisch wet de scanner dan waj betaaln mut, wie dr ontvangn mut en hoevulle provisie de veiling dr zelf van beurt. Det stiet dus allemoale op die label die an de kiste eknupt zit.
Soms krioelt ut dr van de mensn op zo’n veiling, leveranciers, afnemmers en werkvolk van de veiling zelf. De laste joarn bunt dr ok aandere gebouwn bej ekommn woar toeleveranciers in zit met koopwaar zoals skuppn en aander gereedschap. Ok bloembolln en allerlei vergifsoortn kuj dr noe koopn. Mar ok bloemisterijartikeln en promotiemateriaal.
Kortom wurd een hele markt zo langzamerhand en veur öns als afnemmers makkelijk want ie kunt in iene keer vanalles inkoopn zonder daj ik weet nie hoevulle adresies langs mut. Veur de leveranciers ist makkelijk umdet ze heel völle afnemmers langs hun perceeltie kriegt en ze dr nie bej hoeft te wenne. Via de computer kunt ze zo ziene wat dr nog steet en nie verkocht is. Kunt ze zo thuus de waagn vol gooin met neje plenties en dr henn brengn.
Noe is dit systeem nie allenig in öns vakgebied anweezig, nee ie ziet ut völle meer in verschillende bedrijfs sectoorn. Grote verzamelingn van leveranciers bej menare op een soort markt woar dan winkeliers en handelaarn op af komt.
Groetn Gruune Jopie
