Meert Dialect - Foto: Gruune Jopie
Foto: Gruune Jopie

Meert Dialect

DALFS’N – Altied belangriek, veiligheid. Noe hek al een paar keer eerder het puttie an de Camerlinkstroate anekaart, ik komme dr noe ienmoale völle lanks. Hef de gemeente det int noajoar keurig netties emaakt, sie ik det det puttie alweer een paar centimeter boam de stoeprand uutkump. Das snel.

Een entie wieder stiet een bussie van gemeentewerken en verduld, wie stiet doar bej? Jan Ruuter uut Heerde, links met een collega noast hum. Ik ken hum al bienö 40 joar, ik heb zelf namelijk een blauwe moandag bej de gemeente rond eloopn. En toen luup Jan dr ok al rond, stroatemaker 1e klas en toendertied werd hej gehuurd mar ik wet niet of det nog steeds zo is en det giet mej ok nie an. Jan is eignklijk de opvolger van de olde Peters die de oldere luu onder ons wel kent. Den zat altied in de stroatemakers zit en ik kenn hum nie aans. Jan ok net zo, mar ik kenne Jan ok aans, as voetballer hek een paar keer teegn hum espuld en hej was een hele beschaafde laste man en aanvoerder wet ik nog goed. Later ging hej fluitn en van hum hek nooit geel of rood ehad. Nee dan loopt dr wel aandere scheidsrechters rond.

Mar goed det puttie, ik doe mien raampie noar beneedn en zeg, hej Jan hoe kan det noe, puttie stekt alweer ietsie uut?

Ja, zeg Jan, det kump deur det de grote vrachtwaagns de bocht nie haaln kunt deur die twee poalties die doar links stoat en dan mut ze uutwiekn en drukt ze de stoepraan noar benee. Puttie is een heel groot ding wat dan better blif stoan op sien plek. Wej hebt dr al iezeren stangn achter ezet mar zelfs det is nie afdoende.

Ok weer duudlijk, met dank an Jan, trouwens Jan lust graag koffie dus as hej bej oe in de stroate de boel netties mak?

Groetn Gruune Jopie

Foto's 2
Meert Dialect - Foto: Gruune Jopie
Foto: Gruune Jopie
Artikel delen: