Kiek’n wa’j zegt op 28 meert

Kiek’n wa’j zegt op 28 meert

DALFSEN – Meert is dialectmoand. Det weet de luu die geregeld op Dalfsennet kiekt zo toeverdan wel. Bie de Historische Kringe doet wie doar ok wat an.

Det doet wie op donderdag 28 meert um 20.00 uur in de Overkant an ’t kärkplein.
Wie begint den oamd met ‘n veuroffie. Dan lèèst Ab Goutbeek, Marti Brouwer en Wim van Oenen iets veur det zie zölf eschreem hebt. Dan kom ie väste in de stemming veur de hoofdmoaltied: ’t spel Kiek’n wa’j zegt. Dit keer nemt Willie van Oenen det veur heur rekkening. Zie hef ’n verhaal eschreem det zie “de Bladbloazer” hef enuumd. Ie weet wel, zo’n ding det kunstmoatige wind mäk. Veur luu die ’t härken en ’t vèèng verleerd bint. Of doar gien zinne an hebt. In det verhaal zit mooie dialectwoorden verwarkt die in Dalfsen of de umgeving doarvan gebruukt bint of nog ebezigd wördt. En dan giet ’t doarumme det de luu die in de zaal zit noa ’t veurlèzen de juuste betekenis van die worden raodt. Wie de meeste woorden goed hef kreg ’n pries. Die mag zich dit joar dé kenner van ’t Dalfser dialect nuumm.
Gerlof Velthuis spölt mooie deunties op de piano en Jan Sibelt pröt de boel an mekare. Iederiene mag d’r veur niks in, al goat wie an ’t ende wel met de pette rond. ’t Wördt vaste ’n mooien oamd, dus töt dan!!

Artikel delen:
Foto 1