Dialectman geblesseerd - Foto: Gruune Jopie
Foto: Gruune Jopie

Dialectman geblesseerd

OOSTERDALSEN – Volgers ik kon ff gin stukkie maakn, was uutgeschakeld deur een rookkanon. Afgeloopn zoaterdagoamp haddn wej bej ASC een kwis över ASC, de WiekentASC quiz. Nö as ASCer die al bienö vieftig joar lid is wol ik doar wel ff an met doene. De eerste vroage ging dus nie över ASC mar över kantine’s van andere verenigingen.

Ik bun noe ienmal het type van voetballn en hup vot noar huus henn, dus ken gin vremde kantine’s. Wej waarn met een team van vief man en de aandere jongs wissn dr een paar mar önze start was dus slecht met weinig puntn.

 

Ondertied zettn det jonk telkenmoale een rookkanon an en ik zatte weer met de neuse veuran en kreeg dus steeds die rook in de neuze en oogn. Ik bun dr een paar keer bej weg eloopn mar toch ant ende van de oamp wast net of ik huuln. De traann biggeln mej över de wangn.

As team bunne wej in de middnmoot eh eindigt en het team van Bram Gottemaker hef ewunn. Was een mieters leuke oamp  wat de activiteitencomissie biesunder leuk in elkaar estukkn had. Leuke filmpies dr bej, ja mieters.

 

Toen ik sundagmunn wakker wurdn kon ik mien oogn nie luss kriegn, nee gin gekheid, sie zaatn an menare eplakt. Allemoale troep dr in en moss eerst veer moale wassn veur ik wat sien konne. En toen ik ienmoale wat zag, wast erg mistig. Mien vrouwe zeg, ie hebt oogontsteking en goa mar ff op de banke liggn, ik heb doar wel een middeltie veur. Kamille thee blaadn!!

Doar laag ik dan as een vrouwe met een schoonheidsmasker op. Noe mut ik zeggn, hulp weh ietsie mar niet zo völle.

 

Sundag hek de hele dag niks könn doene en moandag bun ik ok mar thuus ebleem. Vandaage hek weer een bettie ant wark ewest en mar weer is dialect op papier ezet.

Groetn Gruune jopie

Joop beterschap moet oen oogzeerte, bedankt dat je ondanks je in de “”ziektewet loopt” toch een dialectverhaal maakt. Want meert ongemerkt veurbie en dan ist al weer ofelopen met het dialect. Red.

Artikel delen:
Foto 1