Het gedoe met het coronavirus. De leste tiet wurter heel veule over het coronavirus epraot. Het is ok iets wat veul invloed hef. Der bint zelfs mensen
die noe extra inkopen gaot doen en volgens mien moe lekut net asofut oorlog is. Ie ziet noe zelfs heel raar det iedereen iniens allemaol nor de plee mut want het pleepapier is niet meer an te sleppen.

De mensen mut misschien eem rustig derbie
gaon zitten um te bedenken hoej ut beste met de toestand umme te gaon. En assie lange op de plee zit muj wel goed de boel schone holn en dan hebbie pleepapier nwudig. Of umdet mensen thuus mun
werken, dan hebt ze tied zat um langer op de plee te zitten en dan kuj mooi vliegtuugies gaon voulen um de tiet deur te komen.

Het kan ok un andere reden hem det ze vulle pleepapier koopt. Aster besmettingsgevaor in de buurt kump dan kunt ze zich inwikkeln met pleepapier um zo te veurkomn det ze ok het coronavirus te pakken kriegt.

Der kan ok een idee achter zitten dat asut pleepapier kats op is, dan kun der mooi an verdienen ajt deurverkoopt. Mar as mensen vwul verse gruunte gaot koopt, dan mut ze ok veul etten, anders verrot oe die verse groente ok nog. De mensen weet nog niet goed hoe ze met de rare toestand met ummegaon.

Het blef afwachen watter op ons ofkump.

Ton Schriever Lemelerveld (de auteur)