DALSEN – Vandage had ik een paar jongn die noar Hessum, noar een tune, toe mössen en sie waarn een sluttel vergettn.(zie mossen noor de Fanzantenbosweg en ik vestund de fezanten loopt mie weg. Red.)  An de telefoon zeggn ik: kom mar noar de brugge, dan stoa ik doar ok en geef ik oe det slutteltie wel ff det in mien auto lig. Hoef ie nie noar de zaak te jaagn. Skelt weer tied.

Bej de brugge haddn sie een prachtige parkeerplaatse veur mie anelegd en ik zage gelieke een auto över de middenstrook henn jaagn. Kraakn oardig onder de auto mar den keal reed gewoon deur. Ik zatte zo te denkn: dr is toch nog weh oardig ruumte hier en sie staot altied op menare te wachn. Vooral as dr iene vanöf de brugge linksöff richting gemeentehuus mut. Soms staot doar hele files.

Haddn sie doar noe gin rotonde kunn maakn en in mien gedacht was ik al ant meetn. Wurd toch weh oardig krap almetal schattn ik zo in. Aj noe in Engeland bunt, hebt ze vake van die minirotonde’s. De schilder skildert een grote ronde cirkel op de stroate, flink straote dr umhenn en sie hebt dr weer een mini rotonde bej. Zo’n minirotonde passn hier zat.

Die rotonde’s vind ik persoonlijk heerlijke dingn, ie kunt altied een bettie gaank holdn en ie stoat nie vake lange stille. Miskien qua tied mak ut niks uut maar ut idee daj ried, ok al ist mar heel langzaam. Det dut tum.

Bej de provincie hebt ze van die luu, die bunt verkeers specialist en die hebt dr meer verstaand van dan ik. Disse specialisten zult ut weh uut erekkend hemn. En de veiligheidsregels bunt in Holland aans dan in Engelaand. Tja zo’n minirotonde was toch ok weh een keer leuk ewest, zal es kiekn of det bej öns achter de kas nie kan.

Groetn Gruune Jopie