Nog meer bromfiets nejs - Foto: Gruune Jopie
Foto: Gruune Jopie

Nog meer bromfiets nejs

DALSEN – Hek ut gister över de bromfietse van Oosterveen ehad, vandage zie’k dr alweer iene stoan. Disse blinkt oe inteegn, helaas nie mien mooie kikkergruun mar Ford blauw?

 

De wereldberoemde Dalfser motorcoereur, Barry Veneman, haalt hum net uut sien busse. Joa, zeg hej, wej kunt dr niks met, alles afelast en wej mut het helemoale van Spanje hemnn. Doar ist een slagveld met de Corona.

 

Noe bunt motors nie mien liefhebberije en kiek ik amper zoiets op TV. Miskien veraanderd det as de anstormende jeugd uut Dalsen met giet doen en op TV kump. De anstormende jeugd, wej hebt dr twee opt moment en sie woont allebeide ook nog kurt bej mie. Een jonk van Fokkert schient ut goed te doene en dus een jonk van önze beroemde Barry Veneman ok. Sie mut dus allebeide al racen int buutenlaand. Ik wet nie wat veur klasse of nivo, mar ajt nie kunt, dan cross ie weh an de Hessenweg op de Broekhuuzen achter de bussies. Zodet niemand oe zit.

Mar goed, munn hek hellige crossers uut de Broekhuuzen achter mie an zittn.

Is best weh mooi, opa Veneman slutteln vrögger an de motors en gunk stiekum as niemand kek, zelf een runtie rien op zo’n snelle motor över t parcour. Barry zat de hele wereld över volgens mej en was geregeld op TV en dan nie soamps heel late, nee in Studio Sport um zeum uur as alle echte keerls TV kiekt. Nö, dan hejt toch bereikt. Det hebt allenig Rene Eijkelkamp en Erben Wennemars bereikt in ons durpie. Oh ja, ok die handbaldeernes mar volgens mej waarn doar weinig Dalfsenaren bej. Dat zak is nö vroagn.

 

Ik lul dr weer vanalles bej an vaste mar t gink umme det jonge kealtie van Veneman. Nie noar skoele en ok nie racen op sien Ford blauwe motor. Miskien zit hej noe ok weh te Playstationnen of begunt uh te voetballn. Söll jammer wenne. Ach dat Corona is gauw geschiedenis hoppe wej dan mar en dan mut dr van t sommer en int nojoar mar extra races georganiseerd wurdn.

 

Binnenkurt um zeum uur op de zundagoamp, Fokkert teegn Veneman. Alle echte keerls kiekt dr nö.

 

Groetn Gruune Jopie

 

 

Artikel delen: