Aj dan över de Lemelerberg goat, kiek ie automatisch noar boam. Althans ik altied. Knetters wat bunt die boomn toch alderbarstens hoge. Bej huuze den Barg stoat hoge en dikke boomn, bej Kasteel Rechtern miskien nog weh oldere en dikkere. Ok bej huuze de Matarm ( joa zo zeg mie va det altied ) stoat hele olde boomn en ok weh hoge.

Kiek ie ietsie wieder, op de Holterbarg stoat ok hoge boomn en op de Hellndoornse Barg ok mar doar bunt ze kurter dan bej Holten. Kiek ie nog wieder, in Limburg of zelfs in Duutslaand doar kom ie ok hele hoge boomn teegn.

Aj dan vanöff Dalmsholte de Barg op ried? Joa det bunt volgens mie toch echt weh de allerhoogste boomn in de wiede omgeving. Miskien överdrief ik noe een bettie, das mej nie vremd, haha, bun een lullaar zo now en dan, mar toch, echt de allerhoogsten heur. Kump miskien ok umdet ik as klein kealtie met mosse noar de Barg en toen ok ah noar boam keeke en geimponeerd werd deur die alderbarstens hoge boomn.

Tjonge, de kiekers van Dalfsennet hebt mej verrast met de mooie complimenties die ik heb ekreegn disse dialect moand. Verrast mej ok det völle jeugd met kek. Jammer det die dialect moand alweer veurbej is. De allerhoogste duum kriegt jullie van mej en tot volgnd joar dan mar weer.

Groetn Gruune Jopie