DALSEN – Doar zit ie dan, in een hökkie teegnöver oe vaa en moe. Frej veul ie oe bej lange nie want ie zit op eslöttn in een hukkie en achter oe zit mensn noar binn te kiekn. Tja, wej waarn de eerstn die dr gebruuk van maakn. Dan ist ok weh logisch daj bekekkn wurd.

Ut Proathuus bej Rosengaerde, vandage dus geopend deur mien moe umdet ze vandage joarig is. 86 is ze ah weer ewurdn. Helaas zit sej ah joarn in een rolstoel mar ie maakt heur nog niks wies. Probeer ut vake genog mar sie trapt dr nie in. Vrögger altied joarig op Koninginnedag en dan was iederiene mooi vrej, hingn dr vlaggn en leup alles int oranje. Ik goa nog weh is noar een rommelmarkt en vind dan weh is een buukie över ut Koninklijk huus. Doar maak ik mien moe dan bliede met want sej is dr een barstens fan van. Alles van de Koninklijke huzen in binnen en buutenlaand wet sej. Sej zuukt dan online vanalles op want zelfs det kan sej goed. Met dr Ipad en telefoontie as een jonge deerne wet sej de weg deur de digitale wereld.

Heur wereld is dr een stuk groter deur ewurdn. Foto’s appn en berichies stuurn. Sej dut ut mar al te grage. Deur Corona mut sej noe binn bliemn en maage wej dr nie bej, ok nie noe ze joarig is. Dan is zo’n hukkie weh een mooie oplossing. An de telefoon sie ik heur nie lachn, mar noe deur zo’n plexie glas wandie dus weh. Sie is bliede det ze mien breur, zus en mej weer is zid. Ik heb begreppn van de direktie van Rosengaerde daj dit hukkie besprekkn mut. Dr is flink vroage noar, heel begriepelijk.

Groetn Gruune Jopie