DALSEN – Dan vroag ie oe öff, zak de skaatsn ophaaln? Wel een bettie hobbeldebobbel ies mar ie kunt dr prima op skaatsn. Muj in Friesland mar us kiekn. Die Friezn skaatsn ast iene nacht flink evreurn had ok zo op de sleuties en meerties.

Ooit zat ik op de Tuunbouwskoele in Frederiksoord en zaten dr ok Friese leerlingen en docenten op. Ast evreurn had spijbeln de leraarn net zo hard as de leerlingn. Skaatsn wolln ze en deed mej altijd denkn an die braandweerluu. As dr braand is, hebt ze een waas veur oogn en mut ze zo snel mogelijk dr henn. Nö det was met die Friesen precies zo, as dr ies was haddn ze mar ien ding an de kop, skaatsn.

Ik rie toch mar weer noar huus en goa nie skaats, bun ok gin fries mar een op en top Dalfsenaar. Wej kriegt een paar daagn dooi en end van de wekke giet ut pas echt vriezn. Volgende wekke is de iesbane geopend, let mar is op mien woordn.

Op natuurijs skaatsn is mieters mooi, vooral op sleuties en meerties. Joarn geleedn bun ik een keer noar Kasteel Rechtern eskaatst vanöff de brugge. Ik mosse weh steeds över de afrasteringn springn maar toch, kwame op steenworpsafstand van ut Kasteel.

Groetn Gruune Jopie