OOSTERDALFSEN – Ik lache mej een breuk, moandagoamp veurspel ik daw volgende wekke skaatsn kunt op de iesbane en ik kriege nog geliek ok. As een kind zo blej bun ik met die snee en ok kolde zodaw skaatsn kunt. Dat ut mej, an de aandere kante geld kost, bedrijfstechnisch, alla tis nie aans.

Vanöff ut moment dat de kans vrij zeker is dat dr flinke vorst kump, bun ik in gedachtn bezig met woar ik allemoale an denkn mutte. Antivries in de auto’s en machines, Waterkraan af etapt en löss ezet. Bloembakkn umme leggn en överah ut water uut haaln.

Sneeschoevers en schuppen paraat, Vogelvoer in huus, genog ettn en drinkn en keersies mocht de elektriciteit haapern.
Noe veurspeld ze ok nog een halve meter snee en miskien sneestorm.

Das aandere koek, ow ow, mien kas?, joa ik wurde bange veur mien kas, 50 cm snee dr op, zoas ze veurspeld, dat kan de constructie echt niet lien. Hoe löss ik dat noe weer op?

Mien bliedschap is ondertussn umme slaagn in angst en zurgn. Bliksum, mien kas?

Code rood, veur iederiene, buutn alle bloembakkn opzied leggn, aanders bevriest ze. Olijf en aandere vorstgeveulige plantn, afdekkn teegn de zunne. Vorst kunt ze vaake weh liene mar vorst en zunne tegelieke nie, dan dreugt ze uut. Werkt hetzelfde as Round-up, haha das een aandere keer uut te leggn.

Jeetje, broeikasklimaat, sneestorm en 12 groadn vorst, wurd spannend vanöff zoaterdag, de hele moand Februari lik ut op winters weer met dooi ertussn deur. Een keer wat aans te proatn dan Corona en Avondklok. Altied mar Rutte en de Jong, noe een keer een leuke weervrouw op tv?

Groetn Gruune Jopie

Commentaar? Niet bej Willy, maar bej mej : gruunejopie@hotmail.com
Of apperde app : 0630-708442