Uut het (openbare) leaven van Hendrik van de Steege - Foto: Ingezonden foto
Foto: Ingezonden foto

Uut het (openbare) leaven van Hendrik van de Steege

DALSEN – Moi, zal ik mie effen veurstell’n, ik bin Hendrik van de Steege argens uut Dalfsen. Ik lope al een mooi tiedtie op disse aardkloot rond en heb oaveral last van. Veural van miezelf… Want mu-j noagaon, noe zit wi-j al een joar met die verrekte Corona opgescheept en nog is ut ende niet in zicht.

Laatst bie de persconferentie zeiden de menister president en hoe heet die Jonge ok alweer, det het nog weh noa de zommer kan word’n, veurdet wi-j weer een bettie normaal kunt leaven.

Jullie en mien hele openbare leaven stiet noe dus al meer as een joar op de kop! En het geet dus nog wel effen duren. Zelfs zovarre, det jonge stellen die graag een machtig mooi trouwfeest willen hoalen, het noe al tut 2 keer toe hebt uut mutten stellen! Zo bint der völle meer feesies en andere plechtigheden uut esteld.

Wi-j bint er dus nog niet zomar kloar mee met die Corona. Mar het is wel mooi um te zien det de meeste mensen zich toch we goed an de Corona- reglementen hoalt um een ander te beschermen.

Ikke ok, ik hoal mie der goed an. Warken doe ik nie meer, veuls te gevoarlijk. Ik heb teeg’n de baas ezegd det het veur zien en mien gezondheid better is det ik thuus blieve. Nou en wat hum betreft mag mien zelf opgelegde kwarantaine doarum wel tut ik (over 15 joar) met pensioen goa duurn zegge teeg’n mie. Dan kon zien bedrief tenminste weer een bettie fatsoenlijk op-ebouwd wurden. Kiek, det vond ik noe netties van hum, dette mie dat weh gunt. Noadeel is wel det ik noe dit joar niet met hum met kan op vakaansie noar de Filistijnen. Mar ik zitte noe dus mooi thuus en ik vroage de buur’n weh of ze mie zo’n 1x in de wekke een ni-j flessie met hoestdraank (lees bittertje) bie de slieterieje willen ophaal’n via det klik en kollekt systeem. Zelf kom ik naargens. Mien auto is zo oald en hef namelijk de accu en de tank zo gruwelijks leug, doar wil nog gien auto-inbreker meer noar kiek’n of e um kan jatt’n.

De aovundklokke,die ophokplicht, doar hebt ok een boel mensen een gruwelijkse hekel an, mar ikke niet. Ik vind ut geweldig. Noa 9uur niet meer noar buut’n. Nou, det maakt mi-j niks uut, want dan is ut toch duuster en mi-j veuls te koald! En dacht ie noe warkelijk det ik ’s moargens um half vieve al ut bedde uutgoa? Echt niet!!

Een ander veurdeel: Laatst um een uur af half elf ’s oamds, schrikk’n mie vrouwe zich rot! Ze zeg “Henduk, haal mie goaw effen die wasse van de liende, want det bin ik helemoal vergette’n!” Ik zegge; mense, det kan nie, want noa 9 uur mag ik niet meer noar buut’n, det doew morg’n vrog weh. Kiek, dus iedere oamd kan ik noe mooi met mien hoestdraankie op de baanke, Netfliks films kiek’n. HEERLIJK!

Det ging vrogger wel aans: toen ha-j nog gien Netfliks en mos ie oe bie de peterolielaampe maar een bette vermaken met een puzzel uut de kraante of zo. Wat mi-j oaverigens weh verbaast, is det ze veurige wekke in de persconferentie zeiden, det as der straks verkiezingen bint, hele volkstammen wel noa 9 uur buut’n op stroate mag weh’n. Dan wurd er dus niet bekeurd. Is det niet een bettie meten met 2 moaten? Bint de hoge besmettings cijfers dan ineens van ondergeschikt belang, want de verkiezingen mutten hoe dan ok deur goan?? Ik snappe det niet en wie het wel weet mag ut zeg’n.

Mensen ik drinke mien hoestdraankie op jullie gezondheid en wens jullie alvast völle wiesheid toe bi-j het stemmen!

Goedgoan,

Hendrik

Artikel delen: