DALSEN – Mooi wark, de leu komt ah bej mej, Jopie doar kuj ok weh iets över maakn. Leuk, ik wurd an alle kaant voort ehulpn. Mar mooiste is ak toch zelf de oogn goed löss holle. Mien fantasie dut de rest.

Zo bun ik bej loonbedrief Lindeboom, afval lössn en ak dan betaaln wille, zie ik die grijns van Bert, giet ut goed? Vrögg hej? Joa prima, giet merakul en ik wille nog eem een foto van oe Zwarte piste maakn.

Zo komt ze volgens mej an de name “de Zwarte Piste” althans dat heur ik dan van mien zeuns die op de wintersport goat. Ik woage mej dr nie an, heb een slechte knie en bun al mieters bliede dak dr met voetballn kanne en goa mien knie niet woagn met de wintersport. Ik heb een neje Kruusband ekreegn en de arts zeggn teegn mej, pas op met voetballn , skieen en alle sportn woar ie de knieen bej neudig bunt. De arts preut nogal vlug dus de eerste sport hek nie goed eheurd mar skieen doe ik dus nie.

Mar goed, woar had ik ut över? Oh ja “de Zwarte Piste”. Bej Lindeboom hebt ze alle snee die onlangs evalln is an een grote bult escheuvn. As det dan een bettie begunt te smeltn blif alle zand en aandere troep liggn en det vormt dan een loagie op de snee. Zo onstiet dr een Zwarte Piste. Volgens mej tenminste.

Groetn Gruune Jopie