Meert, dialectmoand: Hendrik zien buurman - Foto: Ingezonden foto
Foto: Ingezonden foto

Meert, dialectmoand: Hendrik zien buurman

DALSEN – Mien buurman is een merakels beste keal, doar kan ik goed met opschiet’n. Hi-j had ut mooiste baantie van de hele wereld, want hi-j warkte vrogger bi-j een zwembad. De hele dag noar mooie vrouwen in bikini kiek’n en der nog veur betaald krieg’n ok nog…

Teegnwoardig warkt hi-j veur zichzelf en det hef e goed edoane um veur zichzelf te beginn’n , want alle dagen die eindigt op dag, hoeft hi-j niet te werken. Nee, hi-j is noe AOW-er en det is een afkörting veur Algemene Ontwikkelings Warker, want hij dut in zien vrije tied ontwikkelingswark bie zo’n soort van Foster Parentsplan.

Det muj mie toch is uutleggen hoe det werkt buurman, zei ik hum laatst. “Nou”zegt de buurman,” det geet zo: Wi-j steunt de 15 joarige Djamil uut Africa”. “Djamil deut er namelijk alle daag’n wel 2 uur oaver um op schoele te komm’n!”.

Sow, det is niet niks, 2 uur! Zei ik. “Nee, en noe steune wi-j hum met een paar euro in de moand en noe kan det drommelse  jonk het iniens wel in 12 minuten of lopen”. Ha, det is natuurlijk gekheid, zei ik. “Ja natuurlijk” zei de buurman, “mar het klopt wel det wi-j een kind steunen en die  dut het harstikke goed op schoele doar”. Kiek, det is noe mooi van mien buurman.

Verder hef hi-j as hobby honing slinger’n en verkoop’n. Mar het duurt altied wel wat lange bi-j hum veur het pöttie vol is, want hi-j hef mar iene bi-je.

Het kump der dus op neer det de buurman altied wat drukker is dan ikke zelf.  Laatst wol mien vrouwe een daggie uut met heur zuster. “Vi-j det goed Henduk?” vroeg ze mie. “want noe mut ie ut hele huushold’n allenig doen”. Ik zegge, ik redde mie der wel met, goa ie mar gerust vöt. Kon ik namelijk mooi op de baanke liggen Netfliks kiek’n en doar had ik weh schik van!

Toen ze ’s oavonds late weer thuus kwam, vreug ze metene “ hej nog druk ewest vandage Henduk”? Ach mense, ik bin zo druk ewest! Wat ik vandage allemoale wel niet e-doane hebbe: Ik hebbe NIET of-ewassen en NIET e-stofzuugd en NIET op e-ruumd, mar wel mooi televisie e-keek’n.

Zo giet det dan zo af en toe bie oons. Is’t bie jullie niks aans??

En zo an’t ende van dit stukkie vroag ik mie of, of de Dalfser Historische Kring al eens iets op Dalfsennet publiceert hef,  oaver markante Dalfsenaren uut het verleden. Zoals bieveurbeeld Henke van Emmen en waor as die wonen? Zol toch mooi wean as ze det in oons mooie dialect konn’n doene?

Gegroet,

Hendrik van de Steege

Artikel delen: