OOSTERDALSEN – Tis verduld net of dr een lichie schient an de horizon. Van die rare buij’n de hele tied en as dan de zunne eem schient, hej zo een heldere plek int verzier.

Jennemeuje kump dran, zei de oma van Skikie dan altied. Skikie is een jongeman denn bej mej ewerkt heff en ik numen hum op een gegeem moment Skikie umdet wej altied de grootste lol haddn över sien uutspraakn en belaevenissen die hej mej dan vertelln.

Jennemeuje kump dran is een old Dalfsers gezegde as de zunne zo iniens giet schien. Dus as dr een wolk veur de zunne verdwient en plots zunneschien öns gezicht rak.

Bunt typisch van die Skik momenten zeide wej dan teegn menare. Skik woont sien hele leem al in Dalfsen. Sien va en moe ok trouwens . Sien moe kik ok altied vreindelik en lachend en hef ok alktied de grootste skik. Sien breurtie en zussie meest ok trouwens de grootste skik . Sien va wat minder mar as denn skik hef , noe dan heurt ok thele Dalfsen ut.

Sie waarn ok nogah fanatiek met Excelsior en konn allemaole mieters bloazn en trommeln. Ik siede ze nog zo deur Dalfsen loopn. Skik voetbalt nog steeds bej ASC en sien specialiteit was altied hard schietn van grote afstand. Hej hef ondertussn twee mooie dochterties en hij zeggn mej dat een klein skikie dr ok nog een keer kump.

Noe denke jullie allemoale dak goh verklappn wie de familie Skik is? Nö dacht mar nie.

Groetn Gruune Jopie