DALSEN – Ik kom nie völle bej de klantn binn maar noe komm ik een keer bej iemand en valt mien oog gelieke hierop. Hebt ze det ding veur mej op ehangn? Mooi gruun jassie an. Meest heb ik de klompn an, mooi makkelijk. Ik loope natuurlijk heel völle in modder en aandere pröttel buutn. Det zit oe an de klompn. Ik loope ok heel völle in en uut huus.

Klompn is dan zo verrekte makkelijk, ie wipt ze zo an en weer uut. Als ik dan soms mien personeel ziede marteln. Veters löss, koffie drinkn en hup weer veters strikkn. Is veur mej gin doene, ik loope soms weh 20x op een dag noar binn en ok weer naar buutn. Dan bunt klompn toch weh mieterse praktische voetbeschermers. In de reegn blieft de voetn dreuge. Ast warm is blieft de voetn ok nog us lekker koel, holt isoleert gewoon erg goed.

Ooit reed dr een heftruck över mien voet, klompe knappn kapot en ik trakke gauw mien voet terugge, met schoenn an had ik niet meer evoetbald. Noe gingt precies goed.

Allenig met snee ist wellus lastig, plakt oe onder de klompn met gevolg daj steeds langer wurd. Det löp een bettie ongemakkelik. Mar gelukkig sneej’t nie völle meer.

Mar goed, klompn uut aj noar binn goat want aans wurd de huusvrouwe boos.

Groetn Gruune Jopie