OOSTERDALSEN – Joa ut mooiste olderwetse dorpscafe uut de buurte en wat mis ik ut. Deur det Corona gedoe maag ik dr niet henn, en ik niet allenig, nee niemand kan dr henn. Mien vrouw gunk met heur jongn noar de Mac Donald en ik vund det zo vies, Hamburgers met Tomaatn, Uin, Komkommers en alles deur menare.
Kiek een Varkn vret alles deur menare maar een mense toch nie? Ik mut dus alles apart hemm en ik luste gin Uin en aandere vieze prut. Dus doarumme as mien vrouw noar de Mac Donald gunk, zei ik: dan goa ik weh noar de Mac Mansier. Billy, Chris, Jannie en Dinie wet weh dak gin Uin en Champions luste. Peerties graag een bettie warm en een goed stuk Vleisch op mien burd.
Maar wej maagt dr nie meer henn en wat mis ik ut. Gin dreun op mien scholders van Jan Pierik woar ik 2 daagn last van hebbe. Gin Broekie an de bar en ok Martie nie en mien grote vriend Aalt ziede ik ok nie meer. Gewoon ff een proattie maakn met aander volk dan mien personeel, klantn en familie. Kan nie vanwege Corona, wat alles stille leg. Ut liekt weh ien of aandere knienen ziekte det Corona, angstig det ut ok zo snel de weerld över was. Van China in een mum van tied hadde wehh ut ok in Dalfsn en Oldluusn. Hoe sollt met Fritsie goane en Daniel, hoe vaake heff hej sich van de wekke op de vingers esloane? En Geert die zo’n prachtig verhaal had över sien kerstboom thuus.
Die Engelse chauffeur met det steile kuiffie ziede ik ok nie meer. Woar mut det nog henn. Wanneer mag ut weer? De kaartclub, Opa drie en Jan Bosch mien grote PSV vriend. De Biljartclub met Jan Dikke Lucht, van Luusn en Herman. Giet dr altied nog ah serieus an toe as ze competitie hebt. Dan bunt dr steeds weer jongeluu die noa iene minute weer een aander liedie op de radio hemm mut. Geduld hebt ze nie meer teegwoordig.
Loat ze mar gauw al die olde luu een spuittie geem zodet die nie meer Corona kunt kriegn. De jeugd wurd dr toch nie barre ziek van. Kan ik weer noar de Mac Mansier, een duum dikke Karbonade ettn, met Boernmix en warme Peerties. Allemoale apart op mien burd. Een glaassie rode Wien lust ik dr ok weh bej. Tja, wanneer giet mien Mac weer löss?
Groetn Gruune Jopie
