DALSEN РIk schrukke dr van. Was flink ant spittn en stekkn met de schuppe en zo iniens ziede ik een waterdruppel en nog iene en nog iene. Druppen an iene deur. Bliksem dachn ik, kheb een waterslang deur middn eh sțkkn! Ik pakkn det drupding vaste, kiek een keer goed en denke, verrek is gewoon holt, is een wortel. Twee meter wieder stiet een hele grote Hulstboom, doar lup de wortel noar toe.
Ut is mej bekend det Droem, Berkn , Walnootn en nog een stel holtige gewassen een flinke sapdruk hebt en aj det te late snuuj’t dan begunt ze te druppn. Ik hebbe in Januari bej iemand een Haagbeuk esnuuj’d en det ding druppn toen ok een klein bettie. In begun Meert heb ik verschillende Droem esnuuj’d en die druppn nie.
In Januari wast apart warm en dan begunt de Plantn ant veurjoar te denkn. De sapstroom kump op gaank bej Temperatuurn boam de 8 groadn. Half Februari kreege wej vorst en een hele bulte prachtige snee. Doardeur bunt de plantn flink af ekuuld en is de sapstroom dus nauwelijks aanwezig. Tot half Meert ist noe altied hooguut 7 of 8 groadn maar meestal kolder met gevolg det de sapstroom dus ok heel laege is.
Noe terugge noar disse bloedende wortel. Denn Hulst stiet heel mooi beschut en luw achter een huus. Een stukkie warmer dus dan as hej op de winderige vlakte sol stoane. Ik denke det doardeur de sapstroom al op gaank ekomm is en ik dachn det ik een waterslange eraakt hadde.
Groetn Gruune Jopie