DALSEN – Zo’n 40 joar geleden zat ik in klas 6 op de laegere schoele, teegn’swoordig is det groep 8. Op die laegere plattelandschoele en in die klasse waar’n bienoa alle jonges zwoar onder de indruk (want verliefdheid koj ut toen nog niet nuum’n) van de schoonheid van Karin die bie oons in de klasse zat. Mooi slank figuurtie, ie kent det weh en ze vond al die aandacht van die jonges natuurlijk zelf ok wah mooi.
Mar ja, dan goaj van schoele of en raak ie mekare uut het ooge kwiet. Ik geleuf det ze later ok aans noar het westen was verhuusd.
Mar een tiedie geleden liep ik deur et dorp en sprak mie een nogal struise dame an, die mi-j vaag bekend veur kwam. Het bleek dus Karin te wean. 40 joar later – en net zovölle kilo’s meer – zag ik heur dus weer. “ Lang niet gezien Hendrik “zei ze met zo’n hoog Haarlemmerdijks accent. Ik zeg Karin, goejendag, ik had oe niet herkend zo gauw, mar noe zie ik ut. Geet oe goed? “Jazeker”, zei ze. “Ik ben getrouwd, heb 2 kinderen en ben al jaren schoonheids specialiste”. En mar proat’n en proat’n. Ik dache, noe snap ik ok woarum ze van een moedertaal sprekken, want va kump toch niet an’t woord. Affein noa een half uur en een gluunige 5 minuut’n info oaver heur anheur’n, bin ik gauw wieder egoan, want ik mos nog van alles doen in’t dorp.
Kom ik een endtie wiederop Jan teeg’n die ok vrogger bi-j oons op schoele zat, mar die ik nog wel regelmoatig sprekke en gekheid mee uuthale. Ik had em noe echter al een paar moand niet ezene. Iederene was ondertussen – noe de kappers gelukkig weer lös bint- al wel noar de kapper e-west, mar hij bliekbaar nog niet. Ik zegge, wat is er toch met oen kapsel gebeurd? Woont oe kapper soms helemoal in Australie? Hi-j zeg; “nee, hoezo, wat is er mis met mien kapsel?” Ik zegge now , het Sitnie!
En zo kuj dus in 1 dag een heleboel luu teeg’n komm’n die ie al lange niet ezene hebt.
Mensen het geet oe goed en ik hoppe det jullie net zo geniet van meert, dialect moand as ikke, mar ik vroage mie wel of; woarum schrieft ze bie sommige schrieversbonden de oa andersumme? Dus Daor in plaats van doar. Ie zegt toch: Ik goa doo- aaar hen en niet ik goa daa- ooor hen? De ‘o‘ kump dan toch as eerste? Loat toalpuristen zich doar mar eens oaver bugen en het uutleggen. Tut die tied, schrief ik in ieder geval doar, gewoon as doar en niet andersumme. Zo, det wol ik nog eem ezegd hem’n.
Schöt mi-j nog 1 ding te binn’n: vond’n jullie ok niet det er met het stemmen veur de 2e kamer verkiezingen, in de media wel heel erg völle noadruk eleged wurden op het feit det ie het potlood mocht hoal’n?
Gegroet,
Hendrik van de Steege