OOSTERDALSEN – Joa disse kinderties geniet er van. De wadi (meest zonder water) deur de gemeente uut edacht en anelegd bunt echt perfect om in te graam en spittn. Moe wurd nie boos omdet in die wadi geil zaand zit woar aj nie smerig van wurd. Det geile zaand spit makkelijker dan zwarte grond woar meest ok nog völle onkruud in gruuj’t. De wadis bunt meest helemoale oranje van het völle mos wat dr in gruujt.

Goed uut edacht, ontwerpers van de gemeente! Ik snap ok weh dat de gemeente det nie zelf bedacht hebt maar de geleerden van hogere overheeden. Die kauwt het hun veur det een wadi goed is veur de waterafvoer en det ziede ie dus ok in alle nejbouw wieken in alle steden en durpies. Tot er över 10 joar een neje lichting geleerden zit die iets aans bedenkt.

Op die hoge Dalgrond of Esgrond (zo geleerd bun ik , det ik dat weette) in Oosterdalfsen hef een wadi volgens mej nie völle zin umdet ut water gelieke wegzakt in disse hoge Esgrond of Dalgrond. Esgrondn bunt grondn woar joaren op eboerd en eteelt is en meest waarn det de hogere grondn bej durpies die nooit onder water kwaamn te stoane bej overvloedige reegval. Op zökke plekkn vestigden duuzenden joarn geleden de mensen zich umme dröge voetn te holdn ast nat was in veur en noajoar. Doar waarn ze gin wadi veur nödig, reegln de natuur zelf weh. As ie alles volbouwd en volstraot wurd ut weh weer een aander verhaal natuurlijk maar toch, bunt weh heel völle veerkaante meters wadi’s in Oosterdalfsen.

Maar miskien bun ik helemoale mis en had de gemeentelijke ontwerper int zin det de kleinste jeugd lekker mos graam en spittn in Oosterdalfsen! Dank oe, naams mien buurkinderties.

Groetn Gruune Jopie