Meert, dialectmoand: Hendrik en computers… - Foto: Ingezonden foto
Foto: Ingezonden foto

Meert, dialectmoand: Hendrik en computers…

DALSEN – Computers en ikke det ligt mekare niet zo. Ik heb altied ruzie met computers. Het zal wel an miezelf liggen, mar de helfte van de tied dan warkt ze niet of is’t internet errug troag. Dan mut ik weer bell’n met mien provider en eerste wat ze vroagt; “heeft u ook Wifi”? Ik zegge; joaweh die steet in de keuken of te wass’n. “Nee, dat bedoel ik niet meneer, ik bedoel Wai- Fai”.

O, zeg det dan direct, mar det hebbe wi-j wel inderdoad. Kump het troage internet doarvan? “Dat kan”. “En ik zie dat u nog geen glasvezel heeft”. “Daar wordt het internet veel sneller van namelijk”. Ik zegge,man, wi-j hebt boam op zolder al joaren glasvezel heur, mar det helpt gien mieter. Of zol det komm’n det wi-j der oaver hen e-schilderd hebben?? Toen heur’n ik tuut, tuut, tuut in de tillefoon.

Gelukkig heb ik nooit gien problemen met wachtwoord’n onthoal’n, die bint bi-j mie namelijk allemoal hetzelfde. Ik gebruuke altied het wachtwoord verlopen. Det is makkelijk, want ik kriege van de computer nog wel eens de melding ‘uw wachtwoord is verlopen’ en dan weet ik weer wat het ok al weer was. Ik zegge laatst teeg’n mien moat, heb ie ok zo’n makkelijk wachtwoord? “Mien wachtwoord is geheim” Ja ok, mar ie kunt um toch wel an mie vertell’n, zei ik. “Det zeg ik oe toch” ”MIEN WACHTWOORD IS GEHEIM”!

Mien vrouwe hef zo’n digitaal horloge, speciaal veur ut hardloop’n, mar laatst was e kapot. Ze wol um noar de horlogemaker en klokk’n winkel breng’n, mar die had direct gien tied kreeg ze te heur’n. Ik zegge, det is raar: Tied is zien business!

Teeg’nwoardig he’k ok zo’n moderne smartphone met oaveral een app veur. Ik kan bie wieze van sprekken’n as ik op ut werk binne, de garagedeure a vöste lös doen met de tillefoon, zodet ik de auto zo noar binne kan rieden a’k thuus bin. En foto’s maak’n det giet ok geweldig met det dink. Laats was ik bi-j de fotozake an de balie veur een filmrollegie veur mien olde camera. Kuj hoast niet meer an komm’n! Die balienees zeg; “wo-j niet is oaverschakel’n op een digitale camera”? “Hier, dit is heel goed en goedkoop modellegie, die hoarscherpe foto’s maakt”. Ik zegge, ku-j der ok met bell’n dan?. “Nee, det dan weer niet”. ik zegge nou loat mar, ik gebruuke mien olde camera nog wel een poossie.

Vrogger hadd’n wi-j an de muure zo’n bakkeliet’n, zwarte PTT tillefoon hangen, zo’n zwoar en degelijk model met drejschieve, det was heel wat anders dan die mobiels van teeg’nwoardig. De jeugd van noe weet denk ik niet iens hoe zo’n toestel (het lul iezer, nuum’n mien olde buurman det, as zien vrouwe weer 2 uur an’t bell’n was) met drejschieve werkt. Toen ko- j ok gerust zeg’n dej verkeerd verbonden waar’n, as ie ut meissie van oen dreum’n probeer’n te bell’n en heur va of moe pakte an. Noe ziet ze direkt in ut schermpie wie der e-beld hef. De romantiek is der dan toch kats of, niet dan?

Meert dialectmoand is al weer bienoa veurbie! Det ging wel heel snel zo!

Artikel delen: