DALSEN – Vrogger in de joaren 80, gingen wi-j, en iederene van oonze leaftied, zeer regelmoatig op zoaterdagoamd noar Kappers in Hoonhorst. Doar hadden ze van die mooie vierkante afwasteilties, met een boel bierglazen der in. Det was wel heel slim van Geert Kappers.
Umdet het der nog wel is druk was, wurden ie an alle kanten an- estoten, met as gevolg det de helfte van het bier uut de glazen in het teiltie eklotst was, veur dej weer bie oe moat’n waren. Helemoal gien probleem, gewoon de glazen op toafel zett’n en het teiltie weer leug giet’n in de glazen.
Natuurlijk ging ie met de fietse, mar ok vake op de brommer, want op een gegeven moment, wol ie toch wel graag een keer met een meissie brommers kiek’n.
Umdet ie as brommer chauffeur niet zoveule of eigenlijk niks gien alcohol mocht drinken, ging ie vake met oen moat achterop of andersumme. Mar in de praktijk kwam het der op neer det de brommer machinist zelf ut meeste op had en mos degene achterop zat, het hele ding in bedwang hoal’n.
Det dit niet altied goed ging snap ie natuurlijk ok weh. Ie zeil’n dan nog wel es onderuut, zo de sloot in en met völle meuijte ha-j het zwoare ding weer op de wal kaante. Effen trappen en dan leupe ok nog tut grote verbazing. Ai dan thuus waar’n en de sokken uutdeden, dan koj der wel soep van kokk’n, zo smerig as ze waar’n van het slootwater. Mar wat een mieters mooie tied was det toen.
Teegnwoordig bint die disco’s heel aans, ie kunt volgens mie deur het felle flitslicht niet iens meer zien of ie noe met een jongen of een meid stoat te daansen, maar ja, det is natuurlijk wel mooi genderneutraal, woar ze het teegnwoardig altied over hebt. Mar het grote teiltie bier, hef plaats emaakt veur kleine pillegies. Ik goa weh graag met de tied mee, mar doar woag ik mie niet an.
Man, wat een koehandel was het weer um die oavondklokke afgelopen weke. Gelukkig bint ze der uut ekomm’n en wordt het een uurtie later det de aovondklokke in geet. Ik bin noe a kats van de leg, want zoaterdag nacht mut ik der om 2 uur uut um de klokke te verzett’n. Nee, niet um em van de kamer noar de keuken’n verzett’n, mar de wiezers mut een uur veureuut, want in’t veurjoar, giet de tied veuruut. Noe vroag ik mi-j wel of wie der ’s nachts um 2 uur die karktorens beklimt um de tied te verzetten? Sommige karken hebt zelf 4 klokken, det is mie nogal een wark um die te verzett’n liekt mi-j.
Schiet mi-j nog te binnen det ik uut betrouwbare bron e-heurd hebbe, det anstoande donderdagmorgen, de wetholder vanuut het gemeentehuus lopend noar het station giet um de trein van half elf noar Zwolle te haal’n, veur oaverleg met de provincie oaver zien hernieuwde plannen veur de camperparkeerplaats’n . Meestal hef hi-j de papieren zo lös onder de arm, um ze in de trein deur te kunnen leazen. Dus fotografen; doe der ow veurdeel mee…
Gegroet,
Hendrik van de Steege