DALSEN – De moand meert is allemachtig snel veurbi-j egaon! Wi-j zit now a weer an de laaste dag van disse dialectmoand. Ik hoape det jullie net zo veulle plezier as ikke ehad hebt, an het leazen van van al die ingediende collums, gedichten, poĂ«zie, filmpies en natuurlijk muziek in het Nedersaksisch oaveral op internet.
Oons Nedersaksisch maagt wi-j trots op wean en ik heb het gevuul det het gelukkig steeds meer giet leaven onder de mensen. Ik wil Dalfsennet dan ook enorm bedanken veur het mooie podium!
Vanof mie kaante wol ik Meert, dialectmoand 2021, ofsluut’n met een eigen gedicht oaver Oaveriessel:
In Oaveriessel, doar vuul ik mie thuus.
Doar bin ik geboren, doar stiet mien huus.
As ik dan zo mangs langs de oevers lope van de Vecht.
Die meanderd zo mooi deur het landschap, want is niet keersrecht.
Mar ok de Regge, de Dinkel en al die aandere Oaveriesselse rivieren.
Kunt mi-j bekoor’n op hun eigen manieren.
En wat dacht ie van de IJssel, die hele brede waterweg.
Doar dankt oonze provincie zien naam an en is veur völ luu een vorm van broodbeleg.
Noast water hebbe wi-j ok mooie gruune weides en dichte bossen.
Vol met vogels, wild en zelfs hier en doar in de mais zie-j vossen
In Oaveriessel, doar vuul ik mie thuus.
Doar bin ik geboren, doar stiet mien huus.
Wat ok zo mooi is, det is oonze taal in het Oaveriessels dialect.
A-j hier niet vandan komt dan heurt wi-j det direct.
Doch ok een Oaveriesselaar ku-j goed herkennen an zien accent.
Wi-j slikt de woord’n in, det bint wi-j zo gewend.
Noe zit wi-j völle thuus deur Corona-ophokplicht.
Mar de regering zegt; an’t ende van de tunnel gluu-jt weer licht.
Loat wi-j dus hopen det wi’j teeg’n de zomer weer an vrijheid mag goan wenn’n
En det vakaantie gangers oons mooie Overiessel mag komm’n verkenn’n.
Joa, in Oaveriessel, doar vuul ik mie thuus.
Doar bin ik geboren, doar stiet mien huus.
Leu, let goed op mekare en het geet oe goed!!
Gegroet,
Hendrik van de Steege