Knooien helpt soms wel - Foto: Ingezonden foto
Foto: Ingezonden foto

Knooien helpt soms wel

LEMELERVELD – Astiene ding nie meer dut dan muj wat aans verzinnen um toch mar te laoten zien dej nie veur ien gat bint te vangen. Aj ant werk bint met allerlei apparaten dan muj ut geluk hem det die dinge ut blieft doen. Soms wuj dan machtig hellig as zo’n geval der mee opheult. Dan kuj det ding wel in mekare houwn mar dan bij nog verder van huus.

Ik was een keer de slootkante ant meien met een trimmer met van die dreugies. Noe wasut een motortrimmer en die leup al niet al te mooi, want ut stomme ding ging steeds uut en dan mossie um weer antrekken. Det wol een tietie wel aorig, mar oppen gegeem moment kappen ut pokkeding ermee. En toen verdommen ut om nog um weer an te pakken, dus dan konk de rest van die slootkante en berm verder nie meer ofmeien.
Ik hol de wel van um een begonnen klus metiene of te maakn vooral as ut weer nog goed is anders muj in de reign ut karwei ofmaakn. En as det dan mut kuj der wat an oaver holn. En ik denke dan an verkooln of assie een natte rugge kriegt rugprobleem en ik kan nog allerlei andere kwaaln verzinnen, mar doar muj zelf mar achterkomn. Ik wille oe nie bange maakn en assie der zelf achterkomt bij weer een leemservaring rieker.
Dus ik stao noe met een apparaat det nie meer dut, dus wat noe? Machtig hard gaon lippen hef volgens mie ok nie veul zin en nor de buren loopn stiet ok zo zielig, dus bedag ik mie det ik ok nog een elektrische heggeskeere biem mie hadde. Dus ut snoer rap uutrollen en ikke ant meien met die heggeskeere en det ging merakels mooi. Noe hak ut klussie mooi of al wast wel aorig knooien om skootkante te meien. Ie mun soms niet te beroert ween um met knooien toch te kom waor aj wult ween.

Ton

Artikel delen: