Tis ok wat - Foto: Ingezonden foto
Foto: Ingezonden foto

Tis ok wat

LEMELERVELD – Onderweg naor België giet soms met meuite. Mien dochters haan int zin im met hun jungste breurtie op vakaansie te gaon naor België. Eerst natuurluk det coronagedoe veurof. Det leup allemaol goed of. Mien oldste dochter hef een klein autootie. Bie mie thuus mossen ze machtig proppen um al die zooi, die ze neudig haan , in det autootie te kriegn.

Zie waarn een half uur weg en toen belden mien ene dochter al op of ze misschien iets hadden laoten staon. Ikke kieken en inderdaad kokgerei en een luchtberre stond der nog. Dus zie kwaam weerrumme um det spul nog op te haaln. Toen ze weer wegreen zei ik nog veur de gein: nou tot zo. En verduld twee uur later belden ze aweer. Pa nu hebt wiele autopech, want deris ons een wiel offeknapt. Tjonge det is echt wel kloten. Gelukkig was det gebeurt bie een benzinepompstation, want as det was gebeurt op de snelweg was het minder goed offelopen. Mien ene dochter hef een vriend die ik al bieno schoonzeune mag nuem en die kon met autoambulance mien auto ummeruilen met det autootie met die kapoote band. Het was echter wel een hele rit daor naor toe.De wichter ston bie Breda in de buurte en det was tog wel twee uur rien. Dus wiele dren, mar toen wiele de auto met pech op de anhanger woln rien wol det met mueite, want de achterband was offeknapt. Het ofgeknapte wiel reed op de zietkante van de oprieplanke de waagn op. Gelukkig heult Simon de gank derin anders wasse niet goed dur teegnoppe kom. Toen kon wiele weer op huusan en mien kinder kon weer verdan naor België. Wiele kwaam ok in de file terechte, mar een beste tied later kwaam wiele bie de garage um het autootie ofte laden. Wiele haan allebelt of die garageboer ok een heftruck had umdet wiele probleem verwachten bie ut lossen. Mar de gargeboer knuppen een sjorband ant wiel en met een bettie rechtbeugn van ut wiel reed hij det autootie zo derof. Ik dagge: mooi niks meer an doen en laoten zo. Alleen bie de APK zol ut meuiluk worn. Der zol een nieuwe asse onder mun. Noe kunt wiele allerlei oorzaakn verzinnen, mar ondanks de autopech hept die kinder toch gelukke had det hier biee bleem is.

Ton

Artikel delen: