LEMELERVELD – Soms maakie wat mee, dei denkt: wat muk hier noe mee an. Ik waase lest bie een klante van ut bedrijf waor ik toen werkn. Saam met un metselaar, of althans zoon kerl die met specie en stien ant klooien giet, bie un huus in Raolte. Wiele mossen daor un muurtie metselen. Wiele stapt uut de auto, want met de fietse daorhen ging muuluk umdet wiele die metselzooi allemaolbie oons han.
Dus uutestapt leupen wiele de tuun in waor as det muurtie mos kom. De metselaar begon met stien en portland te sjouwen en ik dache laot ik ok mar wat doen en hem un bettie helpen. Ik wasse tenslotte nie veur niiks mee ekommen. Ik wis det veur specie ie metselzaand en portland en water neudig hebt. Ikke ant kruun met ut merselzaand en wil toen met een emmer wat water ophaaln. Dus ik leup um ut huus um te kieken of de luu waor wiele in de tuun waarn al wakker waarn. Mar gin mense te zien en alle deurn op slot en ok reageern niemand op ut beln en kloppen. Ok buuten ant huus gin krane te zien. Bie ut tuunhuusie ok niks te vin wat op water leek. Dus wat noe? Specie zonder water wurd nie wat, dus ik leup naor de collega um hem de bosschop over te breng. Ik keek naor de buurn en zage een oldere man in de badjasse naor zien briembusse loopn. Ha mooi ,dach ik ,misschien kan die man mie an een emmer water helpen.ik leup dren en vreuge hem of hij veur mie een emmer water had, umdet wiele bie zien buurn een muurtie wol metseln en um dan specie te maakn han wiele water neudig. De buurn waarn der nie en zodoende kwaam ik het hem vraogn. O komt u maar ff mee zei de buurman. Hij leup veur mie uut de veurdeure van zien huus in, deur de gang naor de kökn. Toen ik achter die man an leup met mien leuge emmer kwaam wiele langs de deure naor de woonkamer. Toen ik daorlangs wol loopn kwaam de vrouwe van die man de gang oploopn zonder kleere ant lief. Ik wisse toen ff nie hoe ik mie mos gedraang en leup haar veurbie um die leuge emmer vol te doen bie die buurman die op mie stond te waagn. Ik heb mien mond mar stief dichte haoln, want ie kunt oe ok nie overal mee gaon bemuuen. Ik hadde zo’n vermoeden det de vrouwe in haar evakostuum iets of wat dement was, mar det is een vermoeden. Een andere reedn kank nie bedenken, want vanwege mien aantrekkingskracht zalt wel nie ween.
Ton