LEMELERVELD – Jehova’s maakt van alles mee, terwijl ze tog goed bezig bint volgens hun.In mien veurige stukkie hek de man met det scheerschoem an zien snoete het stukkie laoten keurn offet der mee eins was. Ik wol der gin gedoe umme kriegn. Der ston wat fouten in en hij hef ut toen op zien maniere verbetert.

Deurum staot der soms woorden in die ik helemaol nie kenne, mar ut giet nie um die paar rare woorden, mat um ut verhaal. Ik zelf zol ut anders opschriem, mar um ut noe weer te verandern von ik nie neudig. Mar noe giet over jehova’s. Ie mun toch respect veur die luu hem det ze zoveule veur hun geleuf over hebt det ze langs de deuren gaot ondanks alle slechte dingen die ze meemaakt. Dan mut de voet tussen de deure um te veurkom det die weer dichte gooit wurd. Zie kwaam bie mie ok an de deure en ik dagge um hem zelf te laoten bedenken wat hij mos doen asse bie iemand an de deure kwam die totaal gin belang had in zien verhaal. De man antwoordde toen dat hij dan helaas verder mos loopn. Dat is dan wel heel toevallig det hij noe net zoon persoon had annetruffen. Dus ik hoeven hem niks meer uut te legn en hij stapte op. Det was een keer anders bie mien olders thuis. Ik waase doar saam met een breur van mie binnen en der kwam ok een jehova an de deure. Mien breur ging nor de deure en deut um los. De jehova begon zien verhaal met de wachttoren onder zien arm en mien breur kapten hem of met de opmerking det hij gin belang had bie det gelul en det de man mos oprotten anders zol hij de hond loslaoten. Dus de man droop af en liep weer naor zien auto. Mien breur stapte toen in zien eegn auto en gink naor een buurjong een paar huzen verderop ,waore veul mee ummegink. Toen die jehova netties de andere huzen ofleup, kwame ok bie die buurjonge an de deure.
Mien breur, die daor awas ,deut daor ok de deure los en toene die jehova weer zag zeie: “Bei der noe aweer? Heit met de oren of hei mie nie goed verstaon of zo?” De jehova zal wel stomverbaast zich ofvraagn hoe of det noe kon. Mar hij hef nie noges probeert um mien breur omme te proaten. Hij mos tog meemaakn det er ongelooflukke ding kunt gebeurn.
Ton