Aj weet det sommige mensen un bepaalde mening hept over bepaalde zaakn muj det zo laoten.

Hoe andere luu over dinge praot muj soms het iene oor in en tandere oor weer uut laoten gaon. Aj det niet doet dan bij gek op verder gepraot daarover of ie wilt anderen ummepraoten det ze meer oeneign kiek op die zaakn overnemt. Dan hei misschien zelf ut idee det de wereld better wurd as iederiene mar naor oe luustert. In de politiek daor muj juust heel veule van oe of praoten um geliek te krieg ok al slut oen kiek op de zake totaal nens op. Tog muj dan van alles verzinnen um ut geloofwaardig te laoten klinken. Asse der later achterkomt detter gin bal van klopt waj allemaol hebt zitten te neulen dan kuj alteed nog zegn dei ut oe nie meer kunt herinnern. En daor kommie dan gewoon mee weg. Det is ut veurdeel aj een hoge functie hebt. As jan modaal zoiets uutvret dan kanne de boel inpakken en een andere bane gaon zeuken. Of die kreg nog meer gezeik daarover an de broek. Veur de goeie vrede muj een ander wel uut laoten praoten. Ie kunt het wel heuren, mar ie hoefter nie naor te luustern. Een leuk gesprek kan heel mooi ween aj mar nie met allerlei negatieve dingen gaot gooien over en weer. Door wurd niemand better van. Ie kunt better de ander meer een vere in de konte douwen, want det prut toch better dan aj menare met allerlei troep um de oren slaot . Der is a trammelant genog dus een ander in zien waarde laoten daor is niks mis mee. Tenminste as de ander recht van spreken hef en eerluk blef. Mar ie mut zelf mar bepaaln waj der meedoet, want ik hoefe de andern nie te verteln wat ze mut doen. Gezellig praoten is wat aans as bekvegten.
Ton