LEMELERVELD – Um te helpen mos ik bie iemand in de gruuntetuun de boel an kaante maakn. Der stond een bonke onkruud en grus tussen de gepote gruunte. Ok zaten der nog jappel in de grond en die mos ik metiene rooien. Het loof van die jappel lag an een bulte gooit.

Ik waase al aorig goed bezig en hadde al een aorig stukkie schone toen de kerl die ik ant helpen waase bie mie loopn met zien zeune. Hij wol een bettie grappig doen en zei teegn mie:”Hij kiek ie uut dej de uien laot staon met al det gerop”. Ik waase net bezig um brandnetel tussen zien uien weg te haaln en hadde intussen een beste hand vol met onkruid in de handen. Die man stond dicht bie de kruuwaagn en ik gave hem het onkruid wat ik in de handen had aan hem um in de kruuwaagn te doen. Bie det onkruud zat ok die brandnetel en die kwaam prongeluk/expres teegn zien blote arm. En hij tekeergaon dette mie wel een keer zol teruggepakken. Ik zei hem toen dette toch mar us een andere brille mos koopn, want hij kon toch zien detter brandnetel bie det onkruud zat. En hij weer teegn mie det ikke ut der umme deed. En ikke weer det hij kritiek had op mien manier van onkruud wieden. En zo konnen wiel wel een tietie  deurgaon, mar ik mos mar ofwachten hoe hij mie wil teruggepakken. En zo ziej waor onkruud toe kan leiden.

Van onze correspondent uut Lemelerveld: Ton