LEMELERVELD – Assie un plante in de pot zet kanne op den duur te weinig water kriegn, mar ok te veule. As de drainage niet goed is kan de plante dus kapot gaon. As de pot dan gaten in de bodem hef kant water wegloopn bie te veul water. Ik hadde dus een schale met un dichte bodem en daor kank wel un paar gaatn in boorn, dacht ik.

Ik was bie mien breur en die had wel zo’n accubore. Hij was zelf ant klussen en had daor zien bore bie neudig. Ik zei det ik wel mien eign bore op kon haaln, mar hij hatter nog wel eine. Met een stienbore derin most ut allemaol goed kom. Ikke ant boorn en ik hadde un klein stukkie boort toen kapn de bore dermee. Accu leug en det ziej heel vake, dan nem ie spul mee waor aj niks meer mee kunt.

Vooral det accu gereedschap waorbie de accu leug is of nie genog kracht hef. Ik had in ieder geval een klein gaagie en ik kon dan toch met een beiteltie de rest wel deurhouwen. Det ging noe echter mooi niet deur, want toen ik ant houwen ware knapn de hele schale uut menare. Te veul water zol nou geen probleem geem. Noe hak wel een goede drainage, mar noe mos al det zand ok nog weer bie menare um de plante een goeie kans te geem um te overleven..

Want zo was det gin kiek zoas der biestond. Gelukkig hak een plastic pot van ongeveer dezelfde maote en konk de boel zo overpotten. Daor zaten wel gaten onderin en was boel weer trechte. Misschien hak de plante metiene in un goeie pot mun zetten, mar ik probere toch met de pot die ik al hebbe zo te verandern det ut daor ok mee wul. Ut kan welus de verkeerde keuze wen. Dan hek toch weer watte leert.

Ton