LEMELERVELD – Buurn kunt menare ut leem aorig zuur maakn. Op televisie is zo’n programma waorin allerlei zaakn behandeld wurd waor as buurn trammelant hebt en der nie meer uut komt met menare. Det programma hiet: de rijdende rechter. Daor laot ze zien hoe as buurn menare het leem echt zuur maakt. Ondanks praoten met menare ist a zoverre kom det ze menare gin woord meer gunt.

Soms giet a zoverre det ze allerlei rottigheid uit gaot haaln um menare dwars te zitten. Ut giet soms ook over grondeigendom. Dan wurd der met kadasterpeulties heen en weer uscheumen. Het kadaster mutter dan bie kom um nao te meten waor as die peulties noe echt mun staon. As de buurn der net bint kom woon weet die niet hoet vrogger allemaol was en dan denk ze det het toch nie opvalt asse der ietsie grond van de buurn bie pakt. Asster dan ok nog op die ruumte wurde bouwt en andere buurn komter later achter zal die illegale bouw weer esloopt mun wun. Ok de tuungrootte kan sommigen echt dwars gaon zitten. Of een boom die kats in de weg stiet en de zunne wegheult veur de buurn kan veul ergernis veroorzaakn. Ok een sloot die der wel of niet lag mut dan uuttezucht wun. Durum stapt mensen naor de rechter um hun recht te haaln en det gedoe met de buurn eindeluk of te laoten loopn. Ut lullige is dej hierdoor gin gezellige buurn holt um lekker koffie te kun drinkn saam. Goeie buurn daor hei un bult an.