LEMELERVELD – Assie iets onder snelbinders doet kan ween det ut better mut. Un zuster van mie moe was op visite bie haar saam met un andere zuster en un breur. Die ome en tantes waarn op de fietse, want haan misschien int zin um der goed teegn an te gaon en dan kuj better nie met de auto ween. Ik bin der nie bie ewes, dus ik weete nie of ze ok aorig kachel waarn.

Nao un tietie mossen weer op huus an. Dus hup de fietse onder de konte en trappen met die hap. Ut was dreug weer dus dan wolt fietsen merakel best. Eem later mos un breurtie van mie ok met de fietse dezelfde kante op. Onderweg zagge un tassie op de weg lign en anders zolle die in de sloot trappen met de gedachte: wat muk met die pruttel. Noe wolle toch eem kieken ofter nog wat van waarde inzat. Tot zien verbazing was ut tassie van zien tante die un ende veur hem fietsen. Ut was dus un gelukkie det hij ut efun hef. Hij ging eem kieken wat der allemaol inzat en zag tut zien verbazing detter un paspoort, telefoon en portemonnaie en nog andere pruttel inzat. Hij kon zien tante noe niet opbeln det hij ut tassie efun had. Hij wus det zien ome bie haar mos fietsen en dus kon hij hem ff beln of die tante haar tassie ok kwiet was. Die ome zei det hij haar wel ff zol vraogn, want zij fietste un stukkie veur hem. Die tante had haar tassie onder de snelbinders edaone en had niet deur ehad det ut tassie droffefaln was. Mien ome vreug mien breutie of de portemonnaie a leug was, want vindersloon daor doei in de familie niet an. Ut paspoort moge nog eem probeern te verpatsen. Ma die tante mos nog wel naor huus umdet ze int buutenland woont. Mien breurtie gaf mien tante nog un goeie tip det ze de boel int vervolg better mut vasteknuppen want zien moe hef touw zat.
Ton