LEMELERVELD – Met de familie op de boot. Bie oons in de familie hebt wiele ait un familiedag en det wurdt dan umstebeurend eregelt deur un breur of zuster. Tis dus ait un verrassing wat wiele noe gaot doen. Wiele bint noe al met een grote koppel en umdet der ok verschillende leeftietsgroepen bint muj, iets verzinnen wat iederiene leuk vind.

Wiele haan int verleden vake iets met sport en dan kon veural de jeugd eem uutravotten. Veur zoverre de olderen mee wollen en kon doen ,gebeurn ut det die oldern dan un bettie veur lul ezet wun. Tut hilariteit van iederiene en het doel was um iederiene eem weer te zien en assie dan niet op een stoel teegnover menare gaot zitten mar iets uutfret verlup de tiet toch better en sneller veurt gevuul. Deur de grote van de groep hebt wiele noe te maakn met bejaarden en babies. Deur de leeftiet van mie moe hebt wiele het dit jaor met een kleinere groep edaone. Alleen heur eign kinderen met de partners en dan hej een veul kleinere groep. Dus wiele naor ut huus van mien breur in Zwolle. Daor begonnen wiele met koffie met un breutie. Toen iederiene det ophad mossen wiele naor Hasselt um daor in un boot te stapn veur un bootreisie. Veurdet iederiene echter in de auto zat um naor Hasselt te gaon mossen de meesten eerst nog pissen en det was dus wachten tutdet iederiene det edaone had.

Der was oons al via de app anneronne um warme klere mee te nem en wiele haan un jasse bie oons. Pas in Zwolle kreegn wiele te heurn wat der gin gebeurn. In Hasselt lag een boot op oons te wachtn met un bestuurder en un gids. Gelukkig wast un motorboot dus wiele hoem niet te roeien met de gedachte detter dan nog wat uutefreeten wurd. Zo’n bestuurder nuumt ze dan: kapitein. De gids kuj van alles nuum, mar hij deut ut verhaal over de gescheidenis van Hasselt en wat der vrogger en noe allemaol te bekieken is waoras de boot langs kump. De beste man zal zien verhaal steeds opnieuw mun doen bie andere groepn. Deur af en toe un grappie of un leuke kwinkslag probeerte het leuk te haoln. Hij vreug bijvoorbeeld of iemand wist hoe of de kleinste handboeien genoemd werden. Un zwaoger van mie wus et antwoord en zei: “trouwringn”. Het was toch un geslaagde dag saam, mar de jasse hew kats nie neudig ehad. Twas warm zat.

Ton