HOONHORST – Sommige mensen bemuuit zich overal mee en ai der wat op uut doet is helemaol an oe zelf. Ut kan ween det die luu oe alleen mar wilt helpen, deur oe un goeie raod te geem. Umdet ze zelf misschien ut neudige al mee emaakt hebt en doet ze oe een goeie tip um oe geklongel te bespaoren. Mar tis ok weer zo det sommige tips oe ok van de wal de sloot kunt helpen en dan bij nog verder van huus.
Mar offie die tip van mien moe wat weerd is, ik zalt nie weetn. Het giet hier over de tip die mien moe gaf an de burgemeester Erica van Lente, die bie haar op de koffie kwaamp. Dit is niet verzunnen, want mie moe was jaorig en veurig jaor had Erica gin tiet um bie moe op de koffie te kom. Toen kwaamp iemand anders vant gemeentehuus um de honneurs waor te neem. Toen is mien moe nameluk 100 ewun. Noe zat un deel van ut bezuuk bie moe buutn in de tuun al an de koffie, toen Erica kwam anfietsen. Um der buuten bie te gaon zitten hadde kunt, mar umdet ut al iets frisser wun bint der een paar van oons saam met moe en Erica naor binnen egaon um te kieken of Erica ok nog koffie wol hem. Bin zag mie moe de schoenen van Erica en zei metiene:”Hoe kuj daor in godsnaam in loopn?” Zie hef ut verder nie uutelegt en ik ware derzelf nie bie dus ik weet nie wat Erica daor op te zegn had. Ma zol best wel un uutleg daorover hem ehad, mar det hef ze veur zichzelf ehaoln. Zie hebt met menare un mooi tietie zitten praoten en waorover det wuk helemaol nie weetn en konk ok nie weetn. Ik zate buutn en hun zaten bin. Nao un tietie wunt tiet um op huus an te gaon, dus ik leupe saam met un breur naor biin um ma te zegn det wiele vort gin. Erica beut metiene an um ruimte te maakn zodat wiele derbie kon gaon zitten. Mar wiele wol helaas toch vort op huus an en anders zolt veur ma te druk wun. Kweet nie hoelange of Erica nog ebleem is, mar ma zol ongetwiefeld bie ut afscheid ezegd hem:”Nou tut volnd jaor dan mar weer.”
Ton uut Lemelerveld
Reactie van de burgemeester Erica van Lente:
‘Ik vertelde mevrouw Schrijver dat ik een stukje zou gaan lopen die avond. Toen greep ze naar mijn schoen, en verwonderde zich. Of ik daar op ging lopen? Nee toch?! Gelukkig kon ik haar vertellen dat ik ook wel een paar wandelschoenen in de kast heb staan ;-). Het was een mooie en leerzame middag op de Molenhoekweg met een zeer scherpe en krasse 101-jarige. Hoera! Groet, Erica”
Met vriendelijke groet,
Erica van Lente