LEMELERVELD – EHBOdiploma det kuj haaln deur ut te leern. Um mensen te helpen die ut hoogneudig hebt det kan op allerlei manieren. Of die luu der dan blij mee bint det muj oe dan ofvraogn. Tis natuurluk ut mooist asse der blij mee bint dij ze hebt kun helpen. Des better as de handen in de lucht stekken umdij nie weet waj der mee an mut.

Ok ai kinder hebt, ist wel handig um te weetn waj mut doen as oen kind ondersteboom giet of zich ergens an zeer edaone hef. Ut kan ween det ut kind alleen mar zit te bleern um aandacht te kriegn.
Mar ast anders is en ie weet waj mun doen is toch un fijn geveul . Ie kunt gaon leern hoe det mut. Ik hebbe zelf ok ooit det mun leern umdet het bie de opleiding heurn die ik toen deed. Dan kriej een EHBOcursus. As iemand dan van de biene giet of zich machtig zeer edaone hef kuj der wat an doen umdet ie dette eleert hebt. Wiele waarn met un klasse vol met collegaes die allemaol det diploma mossen haaln. Toen wiele volgens de cursusleider genog eleert han kreegn wiele ut examen. Wiele mossen soms ok veur slachtoffer speuln. Achteraf was det soms wel handig, want ut slachtoffer zei stiekum precies veur waj mossen doen ait eem nie meer wus. Wiele haan ut veurdeel det de cursusleider der niet helemaol goed bie was. Hij stunk aorig naor drank. Daor heurn ie oons nie over klaagn, asse oons ut papiertie mar gaf det wiele as volleerd EHBOer verdan kon. Der is toen ok niemand ezakt , dus twas un hele goeie cursusleider waorbie alle cusisten ut haalt hebt. Tegenwoordig ist wel goed ai iemand kunt reanimeren en der hangt steeds meer overal van die AEDapparaten diej kunt gebruukn as iemand te passe kump. Tis ait better um iets dan niks te doen.
Ton