LEMELERVELD  – Ai goed umme gaot met andern wuj ok wel eens un aordigheitie doen ast zo uutkump. Toevallig wast mense jaorig en ik maage dan altied wel un kuppie koffie kom haaln. Zie had al eerder un paar konien ehad en der waarn zelfs meerdere hokn die leug ston. De konien die ze eerder had bint deur een of  ander beest kapotte maakt.

Noe konk mooi un paar neien ophaaln veur haar. Ikke kieken op marktplaats en ja verduld der ston der un paar op en ok nog mooi in de buurte. Want ik kep al is eheurt det iemand goedkoop spul op marktplaats evun had mar der aorig verre veur mos jaang en dan wurd toch weer duur. Mar ik ging die konien ophaaln en zei daor det ik alleen mar moorn(vrouwgies) wol hem. Ik heb eheurt ai rammen(kerlties) nemt en die gaot bie mekare int hok det die dan gaot vechtn en det wuj nie. Ok nie van allebei iene, want zie zegt nie veur niks as bie de konien. Ai un ram en un moor bie mekare doet dan krieg rap un hele familie, want det kunt ze goed. Ik dache dus un paar moorn ekoch te hem. Kep zelf nog ekeekn, mar nie genog ervaring daormee. Ut mense waor ze veur waarn bestemd, waster wel blij mee. Zie verzorgde de bieste merakel best, mar un paar weeke later kreek te heur detter un paar jonge konien bie ekom waarn. Dus ik maage noe annem det ut nie allebeide moorn waarn. Der kan un bult teegwoordig, mar ik heb toch ut geveul dek beduveld bin. Ik kan der un hele toestand van maakn, mar tis gebeurd en wiele mut der mar mee doen. De konien kon in verschillende hokn, dus zo kon ze nog meer uutbreiding veurkomn. Tis wel eem baaln det ut mense noe twee hokn mut biehaoln. Ut kan ok nog zo ween det ze un nieuwe aorigheid ufun hef. Zie kan noe gaon handeln en dan brengt ok nog wat op. Bie handel muj weer oppassen dij gin broodfokker enuumt wurd, det muj ok nie wuln.

Ton