Loopn doei meestal met de voetn - Foto: Ton S
Foto: Ton S

Loopn doei meestal met de voetn

LEMELERVELD – Blaorn bint gin prettie aj un ende wult loopn. Deur corana bint veel meer mensen gon loopn, umdet det nog mog. Um te zurgen dej un ende kunt loopn mut oen voeten goed ween en dan muj der gin zeerte an hem. Tis dan ok better aj un stuk wult loopn dej gin blaorn oploopt. Aj det wel kriegt, ist wel handig det ze oe kunt helpen um verdan te kun.

Bie wandeltochten of bedevaorten dan wuj toch deurzetn um ut of te maakn. Aj echter denkt met bloed, zweet en tranen ut te mutten doen, bij nie goed bezig. Assie met bloed in de schoen gaot denken dij gin mietje mut ween en eem op de tanden mut bieten, is misschien niet zo slim. Um dan te denken dej ok nog met krukken verdan kunt gaon, kan natuurluk ok. Mar luu die nie anders kunt daor muj dan weer respect veur hem. Zo binter ok van die sporters die ondanks alles mar deurgaot en later de gevolgens daorvan kriegt. Ik had al eerder over blaorn. Bie de EHBO hebt ze van die tieden det der aandacht wurd besteed an blaornprikken. Dan kump der een koppel ehbo’ers bie mekare en hept ze ok slachtoffers neudig. Die slachtoffers bint dan zogenaamde wandelaars die blaorn an de voeten hebt. Een cursusleiders dut veur hoei blaorn kunt behandeln en legter van alles bie uut. Der bint van allerlei blaorn en ik heb mie annebeuden um as wandelaar behandeld te wun. Der is un basisbehandeling en det is genog veur effenties. Mar as de wandelaar nog een heel stuk verdan wul dan is det nie genog. Dan mutter een verplleegster of dokter nao kieken. Um dan in plaaste van pleiters een maandverband te gebruukn dej kuj ok nie maakn. De wandelaar mos op un behandeltaofel lign , eerst op de rugge en later op boek. As behandelaar muj zoveul mogeluk informatie kriegn van de wandelaar. Zie gaot dan ok vraogn of ie un diabeet bint of bloedverdunners gebruukt. Ik gebruuke alleen mar alcohol as bloedverdunner en as ik der niet teveule van ophebbe zalt gin probleem geem. Toen ze bie mie ant plakkn waarn, zaten der opt laatst zoveule op, dek mien sokn wel weg kon gooien. Luu die veul wandeltochten loopt zult wel blij ween met de hulpe die ze kriegt en verder zonder piene verdan kunt. Dan hebt de ehbo’ers toch een wit voetje haalt.

Ton

Artikel delen: