Tjonge wat tekeer gaon - Foto: Ton S
Foto: Ton S

Tjonge wat tekeer gaon

LEMELERVELD _ Umdet ut ietsie te hard ging. Um iemand eem te helpen met uien rooien, waak daormee bezig. Iniens kump doar un vrouwe anloopn met un kalf van un hond. Zie ging teegn mie te keer dek int vervolg wel heel rustig mos langskom met de auto. Wat bleek noe weer?

Ut mense woon ietsie eerder ant zandpad waor zie un tuinhekkie an had staon. Vanuut heur tuun kon ze dan met de hond gaon loopn en via det tuunhekke zo op det zandpad kom. Ik kwaam met de auto langsjaagn en zie fund det ik veuls te hard langskwame. Zonder twiefel zal zie wel dik geliek hem, want ik reed niet stapvoets daorlangs zoas zie der graag ezene had. Noe ik weet det zie det liever hef kank mie daor op anpassen. Mar de maniere zoas zie daor an kump stoem vonk wel eem heftig. Zie waarschuwden mie ok nog det ast weer zol gebeurn zie mie un dikke bakkeie deur de roeten zol gooien. De man bie wie ik uien stond te rooien, kwaam der ok bieloopn en deut zien mond niet lus. Hij stond te genieten hoe ikke doar onder uut de zak krege en hij kon zien lachen nog net inhaoln. Later bie de koffie, die ik nog wel krege, verteln hij zien vrouwe hoe of ik daor op mien donder hadde kreegn van de buurvrouwe en zat nog steeds na te genieten. Ach veur hun ist eem iets leuks um mee emaakt te hem. Bie oldere luu ist leem vake un bettie un sleur en aster iets aparts mee emaakt wurd ist un leuke afleiding. Bie de koffie kuj mooi gon neulen um eem de gedachten ens anders bie te hem. Aster echter ok nog met bakkeien egooit wurd, dan valter ok nog wat um over te praoten. Noe heb ik weer eleert um kalm an te doen dan blieft de roeten heel.
Ton

Artikel delen: